Չինաստանի և Թուրքիայի միջև դիվանագիտական սկանդալ է հասունանում. չինացի դեսպանին կանչել են Թուրքիայի ԱԳՆ

Անկարայում Չինաստանի դեսպան Լյու Շաոբինգը կանչվել է Թուրքիայի արտաքին գործերի նախարարություն, որտեղ նրան հայտնել են թուրքական կողմի անհանգստությունը սոցիալական ցանցերում չինական դիվանագիտական առաքելության հրապարակումների կապակցությամբ: Այս մասին հայտնում են թուրքական պաշտոնական շրջանակներում աղբյուրները:

Ըստ տեղեկությունների՝ խոսքը դեսպանատան Twitter-ի էջում տեղադրված հաղորդագրությունների մասին է:

Երեքշաբթի Թուրքիայում ՉԺՀ դեսպանության թվիթերյան էջը նշել էր ընդդիմադիր IYI Parti («Լավ կուսակցություն») կուսակցության առաջնորդ Մերալ Աքշեներին և Անկարայի քաղաքապետ Մանսուր Յավաշին իր գրառման մեջ՝ գրելով, որ Սինցզյան–ույղուրական ինքնավար մարզը Չինաստանի անքակտելի մասն է։

«Սա միջազգայնորեն ճանաչված և անվիճելի փաստ է: Չինական կողմը խստորեն դատապարտում է ցանկացած անձի կամ պետության ցանկացած մարտահրավեր Չինաստանի ինքնիշխանությանն ու տարածքային ամբողջականությանը: Չինական կողմը իրեն իրավունք է վերապահում հիմնավորված պատասխանի»,- նշել է Չինաստանի դիվանագիտական առաքելությունը:

Անկարայի քաղաքապետ Մանսուր Յավաշը գրել էր, որ «այսօրվա պես են հիշում Արևելյան Թյուրքեստանում (Սինցզյան–ույղուրական ինքնավար մարզը) տեղի ունեցած կոտորածների ցավը, թեև 31 տարի է անցել»։

Նմանատիպ գրառում էր կատարել նաև ազգայնական Աքշեները։