Լիբանանը նոր վարչապետ ունի

Լիբանանի պատգամավորները, խորհրդակցելով նախագահ Միշել Աունի հետ, հաստատել են Նաջիբ Միքաթիի թեկնածությունը  վարչապետի պաշտոնում: Այս մասին երկուշաբթի հաղորդել է Al Jazeera հեռուստաալիքը: Ըստ լրատվամիջոցի՝ ավելի քան 70 խորհրդարանականներ սատարել են Միքաթիին, ինչն, այդպիսով, ապահովել է ձայների մեծամասնություն:

Ավելի ուշ Լիբանանի նախագահը հրամանագիր է արձակել Միքաթիին վարչապետ նշանակելու մասին և հանձնարարել է ստեղծել նոր կառավարություն: Պետության ղեկավարի աշխատակազմի հայտարարության մեջ նշվում է, որ Միքաթիի թեկնածությունը ստացել է օրենսդիր մարմնի 72 անդամների աջակցությունը: Ընդդիմությունից դեմ են եղել երկու քրիստոնեական դաշինքների 42 պատգամավորներ, որոնք խորհրդարանում ներկայացնում են նախագահին աջակցող «Ազատ հայրենասիրական շարժումը» և ընդդիմադիր «Լիբանանյան ուժեր» կուսակցությունը:

Նշանակվելուց հետո լրագրողների հետ զրույցում Միքաթին ասել է, որ համաձայնել է գլխավորել կառավարությունը՝ «արտաքինից Լիբանանին միջազգային օգնության երաշխիքներ» ստանալուց հետո: «Ես հրաշքներ գործելու կախարդական փայտիկ չունեմ, բայց հուսով եմ, որ, միավորելով ուժերը և դադարելով միմյանց մեղադրել, մենք կհաղթահարենք Լիբանանը փրկելու դժվարին առաքելությունը»,- շեշտել է նա: