ՀՅԴ Արցախի ԿԿ-ն հանդիպել է ՀՄԸՄ-ի պատվիրակության հետ

Այսօր՝ հուլիսի 18-ին, Ստեփանակերտի ՀՅԴ Նիկոլ Դուման կենտրոնում ՀՅԴ Արցախի Կենտրոնական կոմիտեն հանդիպել է Հայ մարմնակրթական ընդհանուր միության Կենտրոնական վարչության պատվիրակության հետ:

Հանդիպման ընթացքում ՀՄԸՄ վարչության ատենապետ Վաչե Նաճարյանը նշել է, որ պատանիների և երիտասարդների ազգային դաստիարակությունը ՀՄԸՄ-ի հիմնական նպատակներից է: Ելնելով առողջ մտքով, մարմնով և հոգով սերունդներ դաստիարակելու կարևորությունից՝ կազմակերպությունը իր գործունեությունն է ծավալում սփյուռքի գրեթե բոլոր համայնքներում և Հայաստանի հանրապետությունում:

«Արցախում պատանիների և երիտասարդների ազգային դաստիարակության հարցը ևս ՀՄԸՄ աշխատանքների գերակա ուղղություններից է»,- ասել է նա:

ՀՅԴ Արցախի ԿԿ անդամ Դավիթ Իշխանյանը հիշեցրել է, որ Արցախում ՀՄԸՄ-ն՝ որպես ՀՅԴ ուղեկից կառույց, իր աշխատանքները սկսել է 1919թ. օգոստոսից: Դ. Իշխանյանը մասնավորապես նշել է, որ Արցախում ՀՄԸՄ-ի աշխատանքների վերսկսումը պատանիների և երիտասարդների շրջանակներում այսօր առավել քան կարևորվում է՝ նկատի ունենալով Արցախում պատերազմի հետևանքով առաջացած խնդիրները:

Հանդիպմանը ներկա են եղել նաև ԱՀ նախագահի կրթության, գիտության, մշակույթի, երիտասարդության եւ սպորտի հարցերով խորհրդական Արմեն Սարգսյանը, ՀՄԸՄ ԿՎ անդամներ Օշին Փիրումյանը, Դավիթ Հակոբյանը և Սանդրա Վարդանյանը, ՀՅԴ Արցախի ԿԿ անդամներ Արա Պուլուզյանն ու Ալյոնա Դադամյանը:

Հանդիպումը շարունակվել է ընդլայնված կազմով՝ ՀՄԸՄ Արցախի վարչության անդամների մասնակցությամբ: