Թուրքիայում` Արևմտյան Հայաստանում, հայտնաբերվել է ոսկու խոշոր հանքավայր

Ավելի քան 1,2 միլիարդ դոլար արժողությամբ պահուստով ոսկու հանքավայր է հայտնաբերվել Թուրքիայի արևելքում (Արևմտյան Հայաստանի Թոնդրակ լեռան մոտակայքում). հինգշաբթի հայտնել է երկրի արդյունաբերության և տեխնոլոգիայի նախարար Մուստաֆա Վարանքը:

«Մենք հայտնաբերել ենք Մոլլաքարա գյուղի մոտակայքում գտնվող Կոզա Ալթըն հանքավայրում ոսկու պաշարներ՝ 20 տոննա՝ 1,2 միլիարդ դոլար արժողությամբ, ինչպես նաև արծաթ՝ 3,5 տոննա՝ 2,8 միլիոն դոլար արժողությամբ»,- ասել է նախարարը հանքի բացման արարողությանը:

Գյուղը տեղակայված է Թուրքիայի արևելքում`Աղրը նահանգում: Վարանքը նշել է, որ վերջին 10 տարիների ընթացքում երկրում ոսկու արդյունահանման ոլորտում ներդրումների մակարդակն աճել է 25%-ով: 2020 թվականին երկրում շահագործվել է 42 տոննա ոսկի՝ 18 հանքավայրից:

Նախարարի խոսքով՝ այս տարի Թուրքիան մտադիր է արդյունահանել 45 տոննա ոսկի, իսկ հաջորդ հինգ տարիների նպատակն է հասնել 100 տոննա արտադրության մակարդակին: