Էրդողանը պատրաստակամություն է հայտնել աջակցել Վրաստան-Ադրբեջան-Հայաստան եռակողմ համագործակցությանը

Թուրքիան Վրաստանը համարում է տարածաշրջանային համագործակցության բանալին և պատրաստակամություն է հայտնում աջակցել ցանկացած եռակողմ ձևաչափի, այդ թվում՝ Վրաստան-Ադրբեջան-Հայաստան: Այս մասին Անկարայում Վրաստանի վարչապետ Իրակլի Ղարիբաշվիլիի հետ բանակցություններից հետո կայացած մամուլի ասուլիսում հայտարարել է Թուրքիայի նախագահ Ռեջեփ Թայիփ Էրդողանը. հաղորդում է ՏԱՍՍ-ը:

«Մենք հավատում ենք, որ կկարողանանք իրականացնել տարբեր աշխատանքներ, որոնք կամրապնդեն և կբարձրացնեն կայունությունն ու խաղաղությունը մեր տարածաշրջանում: Վերոնշյալի շրջանակներում շատ կարևոր է Ադրբեջանի հետ եռակողմ համագործակցությունը: Մենք՝ Թուրքիան, աջակցում ենք ցանկացած եռակողմ համագործակցության՝  լինի Վրաստան - Ադրբեջան - Հայաստան կամ Վրաստան - Ադրբեջան - Թուրքիա»,- ասել է Էրդողանը:

Նա նաև հայտարարել է, որ որոշում է կայացվել սեղմ ժամկետներում գերագույն ռազմավարական խորհուրդ անցկացնել Վրաստանի մասնակցությամբ:

Իր հերթին, Վրաստանի վարչապետը հույս է հայտնել, որ երկու հանրապետություններն ավելի շատ համատեղ ծրագրեր կկարողանան իրականացնել և խորացնել համագործակցությունը: Ղարիբաշվիլին Էրդողանին հրավիրել է Թբիլիսի: