ԵՄ-ն պատրաստակամություն է հայտնել աջակցել Հայաստանում տեղի ունենալիք ընտրությունների կազմակերպմանը

Եվրոպական հանձնաժողովի փոխնախագահ, արտաքին հարաբերությունների և անվտանգության քաղաքականության հարցերով բարձր ներկայացուցիչ Ֆեդերիկա Մոգերինին հանդիպել է ՀՀ վարչապետ Նիկոլ Փաշինյանի հետ:

ԵՄ դիվանագիտական ծառայության պաշտոնական կայքէջից տեղեկանում ենք, որ հանդիպման ընթացքում ԵՄ դիվանագիտության ղեկավարը հաստատել է աջակցությունը Լեռնային Ղարաբաղի հակամարտության խաղաղ կարգավորման հարցում:

«Այդ համատեքստում չափազանց կարևոր է, որ կողմերը առանց նախապայմանների լիարժեք մասնակցեն բանակցություններին՝  Մինսկի խմբի համանախագահների հովանու ներքո»,- նշված է հայտարարությունում:

Հանդիպման ընթացքում քննարկվել են նաև վերջին զարգացումները, ինչպես նաև ընդգծվել է ԵՄ-Հայաստան երկկողմ հարաբերություններում առաջընթացը:

ԵՄ-ն իր հերթին պատրաստակամություն է հայտնել աջակցել Հայաստանում հաջորդ ընտրությունների կազմակերպմանը և դրանց մոնիթորինգին:

«Կողմերը քննարկել են բարեփոխումների վերաբերյալ Հայաստանի նոր կառավարության հստակ հանձնառությունը և այդ ուղղությամբ արդեն ձեռնարկված կոնկրետ գործողությունները: Մոգերինին հաստատել է, որ ԵՄ-ն պատրաստ է կոնկրետ աջակցություն տրամադրել բարեփոխումներին, այդ թվում՝ տեխնիկական և ֆինանսական օգնության տրամադրման միջոցով, և ընդգծել է կոռուպցիայի դեմ պայքարի և դատական բարեփոխման կարևորությունը»,- ասվում է ծառայության հաղորդագրությունում: