Իրանում տարածվել է Զարիֆի սկանդալային ձայնագրությունը, որն աղմկահարույց բացահայտումներ է արել

Իրանի արտաքին գործերի նախարար Մոհամադ Ջավադ Զարիֆը ափսոսանք է հայտնել ԶԼՄ-ներում իրանցի տնտեսագետ Սաիդ Լիլյազի հետ իր զրույցի արտահոսքի վերաբերյալ՝ ասելով, որ ձայնագրության հրապարակումը վերածվել է ներքին բախման:

Կիրակի օրը ԶԼՄ-ները հրապարակել են մարտ ամսին Լիլիազի հետ Զարիֆի զրույցից մի հատված: Այս երկխոսության ընթացքում նախարարը մասնավորապես նշել է, որ գեներալ Ղասեմ Սոլեյմանին, որը մեկ տարի առաջ սպանվել էր Իրաքում ԱՄՆ ավիահարվածի արդյունքում, կարևոր դեր է խաղացել Թեհրանի արտաքին քաղաքականության և Մոսկվայի հետ բանակցություններում: Բացի այդ՝ Զարիֆն ասել է, որ ԱՄՆ  պետքարտուղար Ջոն Քերին իրեն ասել էր, որ Իսրայելը առնվազն 200 անգամ հարձակվել է Սիրիայի տարածքում Իրանի հետ կապված թիրախների:

Զարիֆը նշել է, որ խորապես ցավում է, որ մտքերի գաղտնի փոխանակությունը կարող է դառնալ ներքին բանավեճերի թեմա։

Տնտեսագետ Լիլազը, ինչպես հաղորդում է Իրանի IRIB հեռուստառադիոընկերությունը, դատապարտել է լրատվամիջոցներում աուդիո ֆայլի «արտահոսքը»՝ հավելելով, որ խոստացել է այդ մասին չխոսել: Նա նաև հետևում է, թե արդյո՞ք գաղտնի ծառայությունները կարող են գտնել ձայնագրությունը հրապարակած անձին:

Զարիֆն այսօր կանչվել է երկրի խորհրդարան՝ բացատրություններ տալու ձայնագրության վերաբերյալ։

ԱՄՆ նախկին պետքարտուղար Ջոն Քերին «Թվիթեր»-ում հայտնել է, որ տարածված տեղեկատվությունը չի համապատասխանում իրականությանը։

Մանրամասնենք, թե կոնկրետ ինչ էր ասել Զարիֆը։

• Գեներալ Սոլեյմանին հերոս էր, և սպանելով նրան Իրաքում՝ Միացյալ Նահանգները լուրջ հարված հասցրեց Իրանին՝ ավելի կործանարար, քան եթե իրանական քաղաք ավերած լիներ։
• Սակայն, ըստ Զարիֆի, Սոլեյմանին լուրջ վնաս է հասցրել նաև երկրին՝ միջուկային գործարքի դեմ մի շարք քայլեր ձեռնարկելով: JCPOA-ն խափանելու համար գեներալը 2015-ին մեկնել էր Մոսկվա (Ռուսաստանի Դաշնության նախաձեռնությամբ, միևնույն ժամանակ Զարիֆը հայտարարել է, որ ինքը Չինաստանի և Ռուսաստանի հետ հարաբերությունների ամրապնդման մեծ կողմնակից է)։
• Ռուսաստանն ի սկզբանե դեմ էր JCPOA-ին և «բոլոր ջանքերը գործադրում էր» պայմանագրերը խափանելու համար, քանի որ Իրանի հարաբերությունների կարգավորումը Արևմուտքի հետ չէր բխում Մոսկվայի շահերից։
• Իրանի արտաքին գործերի նախարարը գեներալ Սոլեյմանիի հետ համաձայն չէր այլ հարցերի շուրջ: Օրինակ՝ նա քննադատել է նրան, որ ռուսական ռազմական ինքնաթիռներին թույլատրել է թռչել Իրանի վրայով՝ Սիրիայում զինյալների դիրքերը ռմբակոծելու համար, ինչպես նաև Iran Air պետական ավիաընկերության կողմից ռազմական տեխնիկա և անձնակազմ Սիրիա տեղափոխելու համար՝ առանց կառավարության գիտության:

Զարիֆը նաև պատմել է, որ Խամենեին քննադատել է իրեն կուսակցության ուղուց շեղվելու, Լավրովի հետ բանավեճի և այլ բաների համար, որոնք գալիք ընտրություններին կվնասեն բարեփոխիչների դիրքերին։

Հիշեցնենք, նաև, որ դեռ 2019 թ. գարնանը Զարիֆը հրաժարական էր ներկայացրել, սակայն կառավարությունն ու երկրի ղեկավար կազմը չէին ընդունել այն. հավանաբար, դա կարող էր կապված լինել հենց Սոլեյմանիի և հոգևոր ղեկավար կազմի հետ ունեցած տարաձայնությունների հետ։