Հայ գերիների վերադարձի մասին բանաձև է ներկայացվել Ֆրանսիայի խորհրդարան

Ֆրանսիայի Վալ դ'Ուազ դեպարտամենտի պատգամավոր, նախկին սոցիալիստ Ֆրանսուա Պուպոնին երկրի խորհրդարան է ներկայացրել նոր բանաձև, որով կոչ է արվում Ֆրանսիային՝ Ադրբեջանից պահանջել վերադարձնել ռազմագերիներին և խաղաղ բնակիչներին ռազմական գործողություններից հետո: Այս մասին ֆրանսիացի պատգամավորը գրել է իր ֆեյսբուքյան էջում՝ հրապարակելով բանաձեւի նախագիծը:

«Ես առաջարկ արեցի ընդունել բանաձև հայ ռազմագերիների անհապաղ ազատ արձակման վերաբերյալ: Արցախում Ադրբեջանի հետ հակամարտությունից հետո շատ հայ զինվորներ դեռ գտնվում են Ադրբեջանում և սպասում են հայրենադարձության: Ադրբեջանի այս պրակտիկան լիովին հակասում է միջազգային իրավունքի նորմերին և Ժնևի կոնվենցիային: Ֆրանսիան պետք է կոչ անի Ադրբեջանին՝ ազատել նրանց, և սա է իմ բանաձևի իմաստը: Ես ուզում եմ շնորհակալություն հայտնել այն խորհրդարանականներին, որոնք համաձայնել են ստորագրել այն»,- գրել է Պուպոնին: