Վրաստանի խորհրդարանի վեց պատգամավոր իշխող կուսակցությունից տեղափոխվել է Գախարիայի թիմ

Վրաստանի խորհրդարանի առնվազն վեց պատգամավոր լքել է իշխող «Վրացական երազանք - ժողովրդավարական Վրաստան» կուսակցությունը և միացել նախկին վարչապետ Գիորգի Գախարիայի թիմին: Այս մասին չորեքշաբթի ճեպազրույցում ասել է պատգամավոր Գիորգի Խոջևանիշվիլին, որը նույնպես լքել է «Վրացական երազանքը»:

«Բոլորդ լավ գիտեք, որ մենք Գիորգի Գախարիայի թիմի մաս ենք կազմում, մենք համախոհ մարդիկ ենք և արժեքները մեզ միավորում են: Գախարիայի հետ համատեղ որոշմամբ՝ մենք անցնում ենք նոր կուսակցություն ստեղծելու փուլին։ Մենք հեռանում ենք «Վրացական երազանք»-ից և շարունակում ենք մեր գործունեությունը խորհրդարանում՝ որպես անկախ պատգամավորներ»,- ասել է Խոջևանիշվիլին:

Հիշեցնենք, որ Գախարիան հրաժարական էր տվել վարչապետի պաշտոնից փետրվար ամսին՝  կուսակցության հետ վրացի ընդդիմադիր Նիկո Մելիայի շուրջ ունեցած տարաձայնությունների պատճառով։