Մեկ տարի կորոնավիրուսի պայմաններում. ՀԿԵ-ն շարունակում է պահպանել COVID-19-ին հակազդելու միջոցները

Արդեն ավելի քան մեկ տարի Հարավկովկասյան երկաթուղին գործում է «արտակարգ» պայմաններում, որոնք թելադրում է կորոնավիրուսային վարակի դեռ շարունակվող համաճարակը:

Այդ մեկ տարվա ընթացքում հակակորոնավիրուսային միջոցառումների իրականացմանը երկաթուղին ծախսել է շուրջ 17 միլիոն դրամ:

Ընկերության ձեռնարկությունների կարիքների համար ձեռք են բերվել 85 հազար տարբեր տեսակի դիմակներ, ավելի քան մեկ տոննա տեխնիկական սպիրտ և մոտ երկու տոննա հակաբակտերիալ գել: Սեփական նախաձեռնությամբ ընկերությունը անվճար տեղափոխում է համաճարակի պատճառով գործուղումների մեկնող բուժաշխատողներին՝ տարվա ընթացքում արդեն տեղափոխել է շուրջ 1800 բուժաշխատող:

Ինչպես նշել է ՀԿԵ գլխավոր տնօրեն Ալեքսեյ Մելնիկովը, ընկերությունը բոլոր միջոցներն է ձեռնարկում իր աշխատակիցներին և ուղևորներին պաշտպանելու համար.

«Երկաթուղին ռազմավարական նշանակության օբյեկտ է, և մենք պետք է ապահովենք դրա անխափան և անվտանգ աշխատանքը` համագործակցելով պետական մարմինների և Առողջապահության նախարարություն հետ: Սանիտարահիգիենիկ խիստ հսկողությունը և աշխատանքային կարգապահությունը մեզ թույլ տվեցին նման դժվար ժամանակահատվածում՝ առանց նույնիսկ մեկ օրով աշխատանքը դադարեցնելու, ապահովել անխափան տրանսպորտային հաղորդակցությունը պետության համար ռազմավարական նշանակություն ունեցող երկաթուղային տրանսպորտի ոլորտում»: