Հայ զինվորականները փորձում են թափանցել Ադրբեջանի տարածք. Ադրբեջանի ԱԳՆ ղեկավար

Հայ զինծառայողները քաղաքացիական տրանսպորտով փորձում են մուտք գործել Ադրբեջանի տարածք: Այս մասին Բաքու կատարած աշխատանքային այցի ժամանակ ԵԱՀԿ գործող նախագահ, Շվեդիայի արտգործնախարար Էն Լինդենի հետ համատեղ մամուլի ասուլիսում հայտարարել է Ադրբեջանի արտգործնախարար Ջեյհուն Բայրամովը:

Ըստ նրա՝ այդ կապակցությամբ միջազգային կազմակերպություններին զեկույցներ են ներկայացվել։ «Մենք միջազգային կազմակերպություններին անհրաժեշտ տեղեկատվությունը տրամադրել ենք։ Բոլոր միջազգային կազմակերպությունները պետք է Հայաստանի վրա ճնշում գործադրեն այս առումով։ Խաղաղության վերականգնման համար կողմերը պետք է կատարեն իրենց պարտականությունները»,– նշել է Բայրամովը։

Ադրբեջանի արտգործնախարարը նաև նշել է, որ, համաձայն ԵԱՀԿ Հելսինկյան եզրափակիչ ակտի, Ադրբեջանը սահմանների անձեռնմխելիության սկզբունքի հիման վրա համագործակցության ձևավորման կողմնակից է։ «Սա տարածաշրջանում համակեցության և խաղաղության հնարավորություններ է ստեղծում: ԵԱՀԿ հետ համագործակցությունն այս ուղղությամբ կարող է օգտակար լինել»,- ասել է նա: