«Քեզ համար մի օր մենք ելանք մարտի…». Բաղրամյան պողոտայում վրաերթի հետեւանքով մահացել է «Արցախ» երգի խոսքերի հեղինակ Սոսի Խանիկյանը

Երեկ Բաղրամյան պողոտայում տեղի ունեցած վրաերթի հետեւանքով կյանքից հեռացել է մի շարք երգերի խոսքերի հեղինակ Սոսի Խանիկյանը: Սոսին խոսքեր է հեղինակել հայկական շոու-բիզնեսի ամենահայտնի ներկայացուցիչների հիթերի համար` Շպռոտ` «Եղիր Ազատ», H.A.Y.Q.` «Մի պատմություն», Էմմի` «Boom-Boom», Արծվիկ` «Դու մնա» եւ այլն… Նա նաեւ վերջին շրջանի ամենասիրված երգերից մեկի` Սեւակ Խանաղյանի «Արցախ» ստեղծագործության խոսքերի հեղինակն է:

Ավելի վաղ  ֆոտոլրագրող Գագիկ Շամշյանը հայտնել էր, որ երեկ՝ մարտի 1-ին, մահվան ելքով վրաերթ էր տեղի ունեցել Երեւանում: Ժամը 20:20-ի սահմաններում Երևանի բնակիչ՝ 31-ամյա  Տիգրան Բոշյանը իր վարած «Mercedes Տ400» մակնիշի 11 ՍՍ 071 համարանիշի  ավտոմեքենայով Բաղրամյան պողոտայում՝ նախկին Կամոյի դպրոցի հարևանությամբ, վրաերթի էր ենթարկել աղջիկ հետիոտնի:

Վարորդը փախուստի չէր դիմել, ահազանգել էր Երեւանի  1-03 շտապօգնություն եւ օգնել օպերատիվորեն ժամանած բժիշկների հերթապահ խմբին՝ վիրավորին տեղափոխել «Արմենիա» բժշկական կենտրոն:  Սակայն, ցավոք, Սոսիի կյանքը փրկել չի հաջողվել:

Սոսին վառ արտահայտված ազգային նկարագիր ուներ, իր անձնական օրինակով ու գործունեությամբ ամենուր թելադրում էր բարձր արժեքներ: Նրա մոտ անսահման գեղեցկությունը սինթեզված էր արիստոկրատիկ վարքուբարքի հետ: Սոսին նաև Հայ Մարմնակրթական Ընդհանուր Միության (ՀՄԸՄ) խմբապետուհի էր: 

Yerkir.am-ի խմբագրակազմը սգում է սիրելի Սոսիի ողբերգական մահը և ցավակցում նրա ընտանիքին ու հարազատներին: