Իրանը հաջողությամբ տիեզերք է արձակել Zoljanah արբանյակակիրը

Փետրվարի 1-ին Իրանի Իսլամական Հանրապետությունը հաջողությամբ տիեզերք է արձակել Zoljanah արբանյակակիրը: Այս մասին փետրվարի 2-ին հայտնել է Իրանական օդատիեզերական կազմակերպության մամուլի խոսնակ Ահմադ Հոսեյնին. հայտնում է իրանական IRNA գործակալությունը:

Ըստ Հոսեյնիի՝ հետազոտական արբանյակակիրն առաջին անգամ գործարկվել է Իրանի  պինդ վառելիքով ամենահզոր շարժիչի տեխնոլոգիայի միջոցով:

«Այս գործարկման ամենակարևոր արդյունքներից մեկն այն է, որ երկիրն այժմ տիրապետում է պինդ վառելիքով ամենահզոր իրանական շարժիչ ստեղծելու տեխնոլոգիային` ավելի քան 750 տոննա ուժգնությամբ»,- նշել է նա:

«Արբանյակակրի հիմնական բնութագրերն են՝ ծախսերի կրճատումը, նպատակներին հասնելու արագության բարձրացումը և շարժական հարթակից գործարկման հնարավորությունը», - ընդգծել է Հոսեյնին:

Ավելի վաղ Իրանի պաշտպանության նախարար, բրիգադային գեներալ Ամիր Խաթամին տիեզերական տեխնոլոգիաների ազգային օրվա կապակցությամբ ուղերձում ասել էր, որ երկիրը ցույց է տվել իր ներուժը գիտության և տեխնոլոգիայի ոլորտում։