Հեղափոխություն չի լինի. Վրաստանի ՆԳ նախարար

Վրաստանի ՆԳՆ-ն թույլ չի տա երկրում հեղափոխություն իրականացնել: Հայտարարությունն արել է Վրաստանի ՆԳՆ ղեկավար Վախթանգ Գոմելաուրին հունվարի 28-ին. հայտնում է Հանրային հեռուստատեսությունը:

Լրագրողները նախարարից հետաքրքրվել են՝ Վրաստանում հնարավո՞ր է հեղափոխություն: Նա հայտարարել է, որ բացառում է նման սցենարը:

«Տարիներ շարունակ նրանք ասում էին՝ հեղափոխությո՛ւն, հեղափոխությո՛ւն: Անհեթեթություն... Հեղափոխություն չի լինի, թող չերազեն դրա մասին: Մենք միշտ կկատարենք մեր պարտականությունները»,- ասել է Գոմելաուրին:

Նա հավելել է, որ երկրում իշխանությունը պետք է փոխվի, բայց ընտրությունների միջոցով, ոչ թե՝ հեղափոխական վերափոխումների:

Հիշեցնենք, որ Վրաստանում 2020-ի նոյեմբերից քաղաքական ճգնաժամը շարունակվում է: Ընդդիմության ամենամեծ՝ «Միացյալ ազգային շարժում» կուսակցության և մի շարք այլ քաղաքական ասոցիացիաների առաջնորդներ հայտարարել են, որ անցած տարվա հոկտեմբերին տեղի ունեցած խորհրդարանական ընտրությունները «կեղծվել են»: Ընդդիմության միայն չորս անդամ է համաձայնել մտնել խորհրդարան, իսկ մնացածները հայտարարել են օրենսդիր մարմնի բոյկոտի մասին: