ՆԱՏՕ-ում նշել են Ղարաբաղում և Բելառուսում տեղի ունեցած իրադարձություններից հետո Ռուսաստանի դիրքերի ամրապնդման մասին

ՆԱՏՕ-ի արտաքին գործերի նախարարները Հյուսիսատլանտյան խորհրդի`արտաքին գործերի նախարարների մակարդակով նիստում, որը տեղի կունենա դեկտեմբերի 1-2-ը` տեսակոնֆերանսի ձևաչափով, կքննարկեն աշխարհում Ռուսաստանի ռազմական դիրքերի ամրապնդումը, այդ թվում`Լեռնային Ղարաբաղում և Բելառուսում տեղի ունեցող իրադարձությունների համատեքստում: Այս մասին երկուշաբթի լրագրողներին ասել է ՆԱՏՕ-ի գլխավոր քարտուղար Իենս Ստոլտենբերգը:

«Նախարարները կքննարկեն, թե մենք ինչ կարող ենք անել՝ ի պատասխան ռուսական ռազմական գործունեության ընդլայնման»,- ասել է նա:

«Ռուսաստանը արդիականացնում է իր միջուկային զինանոցը և նոր հրթիռներ է տեղակայում՝ նոր ուժեր նետելով Հեռավոր հյուսիսից դեպի Լիբիա և Սիրիա: Մենք նաև տեսնում ենք ռուսական ռազմական ներկայության աճ  Լեռնային Ղարաբաղի և Բելառուսի ճգնաժամերի արդյունքում», – նշել է ՆԱՏՕ-ի գլխավոր քարտուղարը։