Ռուսաստանի ԱԳՆ–ն հայտնել է, որ Արցախի կարգավիճակի որոշման մոտավոր ժամկետ չկա

Լեռնային Ղարաբաղի կարգավիճակի որոշման հարցը զգայուն է հակամարտության կողմերի համար, դրա լուծման ժամկետ չկա: Այս մասին չորեքշաբթի լրագրողներին հայտնել է Ռուսաստանի փոխարտգործնախարար Անդրեյ Ռուդենկոն:

«Ժամանակացույցեր չկան: Այս հարցը բավականին զգայուն է»,- ասել է դիվանագետը՝ պատասխանելով ՏԱՍՍ-ի համապատասխան հարցին:

«Մենք ակնկալում ենք, որ դա չի հանգեցնի նոր բախումների, առավել ևս` արյունահեղության: Այնուամենայնիվ, Մինսկի խումբը շարունակում է մնալ էական դերակատար, որը կլուծի այն խնդիրները, որոնք արտացոլված չեն համաձայնագրում»,- պատասխանել է Ռուդենկոն՝ անդրադառնալով Ադրբեջանի նախագահ Իլհամ Ալիևի հայտարարություններին Լեռնային Ղարաբաղի հատուկ կարգավիճակի վերաբերյալ:

Ռուդենկոն հավելել է, որ Լեռնային Ղարաբաղում ռուսական խաղաղապահ զորախմբի թվի ավելացման հարցը չի քննարկվել: «Ռուս խաղաղապահների թիվը հստակ սահմանված է երեք նախագահների հայտարարության մեջ: Մենք ելնում ենք այնտեղի գրվածից»,- ասել է նա, նաև՝ հավելել, որ Մոսկվան ակնկալում է, որ Հայաստանում իրավիճակը չի ազդի Ռուսաստանի Դաշնության, Ադրբեջանի և Հայաստանի ղեկավարների միջև համաձայնագրերի կատարման վրա:

«Մենք չենք մեկնաբանում այլ երկրների ներքին իրավիճակը, սա նրանց ներքին գործն է: Հուսով ենք, որ հայաստանյան իրադարձությունները չեն հանգեցնի իրավիճակի ապակայունացման, ինչը, ի միջի այլոց, կարտացոլվի երեք առաջնորդների ստորագրված հայտարարության ճակատագրի վրա»,- ասել է Ռուդենկոն՝ պատասխանելով ՏԱՍՍ-ի հարցին: