ՏԵՍԱՆՅՈՒԹ․ Պորտուգալահայերը Լիսաբոնում բողոքի ցույց են անցկացրել և բարձրաձայնել ադրբեջանական ագրեսիայի մասին

Պորտուգալիայի Լիսաբոն քաղաքում հոկտեմբերի 5-ին անցկացվել է բողոքի ցույց տեղի հայ համայնքի մասնակցությամբ։ Պորտուգահայերը համախմբվել էին՝ բարձրաձայնելու Արցախում Ադրբեջանի սանձաձերծած պատերազմի մասին և գրավելու տեղական մամուլի ուշադրությունը։ Ցույցի կազմակերպիչ, Լիսաբոնի համալսարանում հայոց լեզվի և մշակույթի դասախոս Լիա Խաչիկյանի խոսքով՝  օրը հատուկ էին ընտրել, քանի որ հոկտեմբերի 5-ը Պորտուգալիայի Հանրապետության հռչակման օրն է։

«Բոլորիս անունից ուզում եմ շնորհակալություն հայտնել այն ընտանիքներին, որոնք Հայաստանում են։ Այն մարդիկ, որոնք իրենց հարազատներին են կորցրել, ձեր վիշտը նաև մեր վիշտն է, մենք բոլորս ձեզ հետ ենք։ Թեպետ քիչ ենք, սակայն մեր ամբողջ նվիրումը, մտածմունքները ձեզ հետ են։ Կփորձենք մեր կողմից ամեն ինչ անել, որպեսզի ամբողջ Պորտուգալիայում լսելի դարձնենք այն ամենը, ինչ տեղի է ունենում այսօր Հայաստանում և Արցախում։ Դա մեր պարտքն է»,-նշել է նա։ 

Տեղի հայերի կոչերին միացել էր նաև պորտուգալացի ինժեներ Ռիկարդու Պառաշուն։

«Թուրքիան վարձում է սիրիացի ահաբեկիչների Լեռնային Ղարաբաղում խաղաղ բնակչությանը սպանելու համար։ Մենք այստեղ ենք, որպեսզի բոլորն իմանան՝ սա պետք է դադարեցվի։ Բավական է»,-ասել է պորտուգալացի ցուցարարը։