Մուշը 2010 թ․ տնտեսական զարգացվածության առումով առաջ է անցել Վանից

Մուշ նահանգը 2010 թ․ տնտեսապես զարգացվածության առումով առաջ է անցել Վանից։ Թուրքիայի Հանրապետության նահանգների տնտեսության ցուցանիշների սանդղակում 2010 թ․  Մուշը և Վանը վերջին հորիզոնականներում  են գտնվել։ Այդ մասին, ըստ Akunq.net-ի, հաղորդում են թուրքական լրատվամիջոցները։

Աղբյուրի համաձայն՝ CNBC-e Business ամսագիրը 2010 թ․ հրապարակել է Թուրքիայի նահանգների տնտեսության ցուցանիշների զեկույցը, ըստ որի՝ Մուշը և Վանը գտնվել են վերջին տեղերում։ Մուշը տեղ է գտել 78-րդ, իսկ Վանը՝ 79-րդ հորիզոնականում։ Աղրը (Արարատ-Ակունքի խմբ․), Բինգյոլ (Բյուրակն-Ակունքի խմբ․) և Բիթլիս (Բաղեշ-Ակունքի խմբ․) նահանգները տնտեսական զարգացվածության ցուցանիշներով գտնվել են ավելի բարենպաստ դիրքերում։

2010 թ․ Մուշը Թուրքիայի մյուս նահանգներից հետ է մնացել նաև բնակչության կրթվածության և գործազրկության մակարդակի առումով։ Այսպես, օրինակ, կրթվածության մակարդակի ցուցանիշներով Մուշը գտնվել է 80-րդ, իսկ Բինգյոլը և Բիթլիսը՝ 70-րդ հորիզոնականներում։ Նույն պատկերն է նաև առողջապահության ոլորտում․ Մուշը տեղ է գտել 77-րդ, իսկ Բինգյոլն ու Բիթլիսը համապատասխանաբար՝ 56-րդ և 66-րդ հորիզոնականներում։

Ուշագրավ է, որ CNBC-e Business ամսագրի իրականացրած ուսումնասիրության համաձայն՝ Մուշը, հարևան նահանգների համեմատ, առաջատար դիրքերում է հանցագործությունների նվազ թվով։ Ավելին, Մուշը 2010 թ․ հայտարարվել է Թուրքիայի ամենաապահով քաղաքներից մեկը։

http://www.musovasi.com/haber/ekonomide_van_in_onundeyi-6373.html?fbclid=IwAR0VD9RxNfLZI0i1Ptw-qg9N9pJsN_5E1kTUkB9YiY6Ys_EabOYO2qaRSOY

Թարգմանեց Մելինե Անումյանը

Akunq.net