ԱՄՆ-ը դադարեցնում է ռազմական տեխնիկայի արտահանումը Հոնկոնգ

ԱՄՆ-ը դադարեցնում է ամերիկյան ռազմական արտադրանքի և երկակի նշանակության որոշ տեխնոլոգիաների արտահանումը Հոնկոնգ. այս մասին իր թվիթերյան էջում գրել է պետքարտուղար Մայք Պոմպեոն։

Նա, մասնավորապես, նշել է՝ եթե Պեկինն այժմ Հոնկոնգին վերաբերվում է «մեկ երկիր, մեկ համակարգ» սկզբունքով, ապա Վաշինգտոնն էլ պետք է նույն կերպ վարվի։

Պետդեպարտամենտի հաղորդագրությունում միևնույն ժամանակ ասված է, որ ԱՄՆ-ը ստիպված է ձեռնարկել այդ գործողությունը՝ երկրի ազգային անվտանգությունն ապահովելու համար։

Ավելի վաղ հայտնել էինք, որ Չինաստանի բարձրագույն օրենսդիր մարինն ընդունել է Հոնկոնգի ազգային անվտանգության մասին օրենքը. այն թույլ կտա Պեկինին տարածաշրջանում ստեղծել սեփական հատուկ ծառայություններ և արգելել բողոքի ակցիաների անցկացումը։

Սպիտակ տունը Չինաստանի նախաձեռնությունն ընդունել է որպես Հոնկոնգի ինքնավար կարգավիճակի խախտում, ու այդպիսով խոստացել է պատասխանել պատժամիջոցներով։