Բելառուսում ընդդիմության ստորագրահավաքի ժամանակ ձերբակալություններ են կատարվել

Բելառուսի մի շարք քաղաքներում ընդդիմության թեկնածուների համար ստորագրահավաքներ են սկսվել. այս մասին գրում է Ruptly լրատվական գործակալությունը, նշելով՝ ընդդիմությանն իրենց ձայնը տալու համար հազարից ավելի մարդիկ են հերթում կանգնել։

Ոստիկանության աշխատակիցները հավաքվածներին զգուշացրել են, որ թույլատրվում է միայն ստորագրահավաքը, իսկ այլ զանգվածային միջոցառումներն արգելված են։ Սակայն ստորագրահավաքի մասնակիցներից շատերը պիկետներ են անցկացրել։

Ըստ Interfax լրատվական գործակալության՝ իրավապաշտպան կազմակերպությունները հաղորդել են, որ Մինսկում առնվազն 10 մարդ է ձերբակալվել։ Ձերբակալվածների շարքում կան ընդդիմադիր քաղաքական գործիչներ։

Բելառուսի նախագահական ընտրություններին մասնակցում է 14 թեկնածու, այդ թվում՝ գործող նախագահ Ալեքսանդր Լուկաշենկոն, ով այդ պաշտոնը զբաղեցնում է արդեն 25 տարի։

Հիշեցնենք՝ Բելառուսում նախագահական ընտրությունները կկայանան օգոստոսի 9-ին։