ՏԵՍԱՆՅՈՒԹ․ Ադրբեջանի զորավարժությունները հիմնականում հարձակողական բնույթի են եղել․ Ջալալ Հարությունյան

Արցախի Հանրապետության Պաշտպանության բանակի հրամանատար Ջալալ Հարությունյանը նախագահ Արայիկ Հարությունյանի հետ հանդիպմանը զեկուցեց առաջնագծում տիրող օպերատիվ իրավիճակի, հակառակորդի կողմից անցկացվող զորավարժությունների, դրանց բնույթի և տեղաշարժերի մասին՝ հայտնում է Yerkir.am-ը:

«Մայիսի 18-22-ը Ադրբեջանի Հանրապետության ԶՈՒ անցկացրած օպերատիվ-մարտավարական զորավարժությունները հիմնականում հարձակողական բնույթի են եղել, ներգրավված է եղել բավական քանակությամբ հրթիռահրետանային սպառազինություն, զրահատեխնիկա, անձնակազմ, ուղղաթիռներ, անօդաչու թռչող սարքեր և այլ զորքեր»,-ասաց Ջալալ Հարությունյանը։

Նա մտահոգություն հայտնեց, որ պարբերաբար արձանագրվում են հրադադարի ռեժիմի խախտումներ և այդ նպատակով ՊԲ-ն իրականացնում է կանխարգելիչ միջոցառումներ։

Նախագահ Հարությունյանը նշեց, որ Արցախի Հանրապետության իշխանությունները՝ զինված ուժերի հրամանատարական կազմի հետ միասին, կատարելու են առավելագույնը երկրի պաշտպանունակության հետևողական բարձրացման և զինծառայողների սոցիալ-տնտեսական հիմնախնդիրների առաջնահերթ լուծման ուղղությամբ:

Նա ընդգծեց, որ ձգտում են ՊԲ հերթացուցակում գտնվող սպաներին նախատեսված ժամկետից շուտ բնակարաններով ապահովել․ 2023 թ-ին նախատեսված ծրագիրը կփորձեն ավելի շուտ ավարտել:

Նաև խոսեց առաջնագծի նյութատեխնիկական բավարարման մասին։

Մանրամասն՝ տեսանյութում․