Այսօր Արմեն Ավագյանի հիշատակի օրն է

Մայիսի 15-ը Մարտունու շրջանի Աշան գյուղի ինքնապաշտպանական ուժերի հրամանատար, ՀՅԴ գաղափարակիր Արմեն Ավագյանի հիշատակի օրն է:

Արմեն Ավագյանը ծնվել է 1967թվականին: 1985-1987 թվականներին ծառայել է Լեհաստանում։ Այնուհետեւ վերադարձել հայրենի գյուղ, ամուսնացել,հաստատվել գյուղում:

Երբ դեռ նոր էր սկսվում Արցախյան շարժումը, Արմեն Ավագյանն արդեն իր հայրենի գյուղում ինքնաշեն զենքեր էր  պատրաստում՝ գուշակելով մոտալուտ պատերազմը: 1988-ին  նրա ջանքերով Աշանում կազմավորվում է ինքնապաշտպանական խումբ, 1989-ին՝ կամավորական ջոկատ: Ջոկատը մասնակցում է նաեւ Աշանի հարակից գյուղերի պաշտպանությանը:

1989-94-ին Աշանի ջոկատը կամ նրա առանձին ազատամարտիկներ, համագործակցելով այլ կամավորական ջոկատների հետ, մասնակցել են Աշանի և շրջանի գյուղերի ինքնապաշտպանական, իսկ Մարտունու պաշտպանական շրջանի  ինքնապաշտպանական ստորաբաժանումների կազմում՝ Քաշաթաղի, Մարտակերտի, Աղդամի շրջանների ազատագրական մարտերին։ 

1992 թվականի մայիսի 15-ին Գյուլաբլու կոչվող վայրում զոհվում է Արմեն Ավագյանը: Հետմահու պարգեւատրվում է <<Մարտական խաչ 2-րդ աստիճանի>> շքանշանով: