Դեռ մեկուկես ամիս առաջ պետք էր ձերբազատվել «դուխով մարդու» հանդերձանքից

2018 թ. բոլորիս օգնությամբ իշխանության եկած քաղաքական ուժը վերջին շաբաթների ընթացքում ապացուցեց, որ անկախ նրանից` ով է սխալվել, այնուամենայնիվ, իրենք ճիշտ չէին: Ճիշտ չէին, որովհետև պետության անվտանգությունն ստորադասեցին սեփական բարեկեցությանն ու տրվեցին քաղաքական արկածախնդրության, որի դառը պտուղներն այսօր «վայելում» ենք բոլորս: Մինչ աշխարհի մեծ պետությունները պատրաստվում էին դիմադրել օրեցօր ահագնացող համավարակին, ՀՀ վարչապետը փողկապը պարանոցին, սպորտային դուխաթաթախ գլխարկը գլխին, շրջում էր երկրի տարբեր բնակավայրերում ու բազմամարդ հանրահավաքներ կազմակերպում` հայտարարելով, թե համավարակն ում շունն է, որ մեզ համար խնդիրներ ստեղծի:

Դրան զուգահեռ էլ Առողջապահության նախարարը հայտարարում էր, որ վիրուսը շատ վտանգավոր չէ, և լուրջ միջոցառումների կարիք չկա: Իհարկե, օրեր անց վարչապետը զգաց, որ «շունը» լավ էլ մեծ է, և այնքան սանձարձակ, որ կարող է կծել նրան, ով հայտնվի ճանապարհին. արտակարգ դրություն հայտարարվեց: Ավելի ուշ` ինքնավստահության ավելցուկ ունեցող Արսեն Թորոսյանն էլ հուսահատ հայտարարեց, որ վիրուսը դուրս է եկել վերահսկողությունից, այո, այո, այն վիրուսը, որը պարոն Արսենի համար որևէ լուրջ բան չէր, և ինչպես ասում էր իմ և ձեր, մեր բոլորիս վարչապետ Նիկոլ Փաշինյանը, կարելի է «օղիով դեզինֆեկցիա անել ու պինցետով հատիկ-հատիկ հանել». ժողովրդական առածը նման դեպքերի համար է` լեզուն ոտքերի տակ է ընկնում:

Երեկ էլ իմացանք, որ տղերքը պատրաստվում են արտակարգ դրությունը երկարացնել ևս մեկ ամսով` «անլուրջ շանից» խուսափելու նպատակով: Իհարկե, ճիշտ որոշում է, անհրաժեշտությունից ելնելով են անում, բայց եկեք անկեղծ լինենք ու նկատենք, որ դեռ մեկ-մեկուկես ամիս առաջ կարելի էր ձերբազատվել «դուխով մարդու» հանդերձանքից, խելամիտ լինել ու լսել մասնագետներին, որոնք զգուշացնում էին՝ առաջիկայում ամբողջ աշխարհի առաջ չոքած ուղտը Հայաստանի դռանն էլ է չոքելու:

Ի՞նչն էր պատճառը, ինչու՞ ժամանակին չարեցին անհրաժեշտ քայլերը, խորհուրդ տվողները «սև» էին դրա՞ համար, թե՞ ժամանակ չկար... ոչ էլ ցանկություն: Վերջիվերջո, ով է պատասխանատվություն կրելու ստեղծված իրավիճակի համար, Ազգային ժողովում ե՞րբ է ստեղծվելու Կորոնավիրուսի տարածման պատճառները քննող հանձնաժողովն ու բացատրություններ պահանջի կառավարության մի շարք անդամներից: Այսօր Արսեն Թորոսյանն ու Նիկոլ Փաշինյանը ներողություն ունեն խնդրելու` համազգային և համապետական վտանգին անլուրջ, ոչ մասնագիտական, խեղկատակ վերաբերմունք ցուցաբերելու, և պետությունը վտանգի առաջ կանգնեցնելու համար: Որքան էլ դա ցավալի լինի մասնավորի համար, ընդհանուրի համար կարևոր է: Ցավոք սրտի, ոչ միայն չենք լսում այդ ներողությունը, այլև այանատես ենք լինում մեղավորություն կոծկող աճպարարությունների, և համատարած կլոունադա է տիրում:

Գեւորգ Գյուլումյան