Առաջիկա օրերին հանրային տրանսպորտի աշխատանքը կարգելվի. Փաշինյան

Առաջիկա օրերին հանրային տրանսպորտի աշխատանքն ընդհանրապես կարգելվի. ֆեյսբուքյան ուղիղ եթերում հայտնեց ՀՀ վարչապետ Նիկոլ Փաշինյանը:

«Փորձը ցույց է տալիս, որ հանրային տրանսպորտը վարակի տարածման առումով ամենամեծ ռիսկայնությունն ունի: Մյուս կողմից` այն ոլորտներւմը, որոնց աշխատանքը թույլատրվում է, տրանսպորտային ծախսերը եւ փոխադրումների հարցը պետք է հոգան գործատուները, որպեսզի աշխատողների վրա հավելյալ ճնշումներ չլինեն«,- նշեց նա:

Միջմարզային երթեւեկությունը, ըստ վարչապետի, առաջիկա շաբաթվա ընթացքում արգելվելու է, սակայն Երեւանում եւ մարզերում տաքսիների գործունեությունը թույլատրվելու է, ոչ կանոնավոր ուղեւորափոխադրումները նույնպես կարող են գործել:

«Անձնական փոխադրումները, իհարկե, սահմանված սահմանափակումների շրջանակում նույնպես կթույլատրվեն: Իհարկե, պարետատունը կսահմանի այն դեպքերը, երբ տեղաշարժը կթույլատրվի տեղաշարժի թերթիկներով եւ գործատուների տեղեկանքներով»,- ասաց Փաշինյանը:

Հիշեցնենք, որ ավելի վաղ կառավարությունում տեղի է ունեցել Հայաստանի Հանրապետությունում կորոնավիրուսի տարածումը կանխարգելող աշխատանքները համակարգող հանձնաժողովի նիստ, որի ընթացքում վարչապետը հանձնարարել է ներկայացնել Արտակարգ դրության ռեժիմի երկարաձգման կառավարության որոշման նախագիծ, որի ընդունմամբ Սահմանադրության ուժով կգումարվի Ազգային ժողովի հատուկ նիստ: