Էրդողանը տեսակցել է երկարատև հիվանդության մեջ գտնվող Մարգար Եսայանին

Թուրքիայի նախագահ Ռեջեփ Թայիփ Էրդողանը երեկ տեսակցության էր գնացել իշխող Արդարություն և զարգացում կուսակցության՝ ծագումով հայ պատգամավոր Մարգար Եսայանին: 2019 թ. հոկտեմբերից Մարգար Եսայանը բուժում է ստանում: Թե ինչ հիվանդությամբ է տառապում Եսայանը՝ հայտնի չէ, բայց լուսանկարներից երևում է նրա հյուծված տեսքը:

Գրող, հրապարակախոս Մարգար Եսայանը երկար տարիներ պատգամավոր է Թուրքիայի ազգային մեծ ժողովում: Եսայանը բազմիցս է հանդես եկել ոչ հայամետ հայտարարություններով: Մասնավորապես նշում է, որ 1915 թ. տեղի ունեցածը ոչ թե ցեղասպանություն էր, այլ տեղահանություն և աքսոր: Որևէ երկրի կողմից Հայոց ցեղասպանության վերաբերյալ դրական որոշման ժամանակ, Եսայանը հանդես է գալիս քննադատությամբ՝ ի շահ Թուրքիայի:

2019 թ. հունիսին ԱՄՆ Հայ Դատի հանձնախումբը սոցցանցերում #Ստամբուլը կրկինդարձրուԿոստանդնուպոլիս (#MakeIstanbulConstantinopleAgain) հեշթեգով լուսանկար էր հրապարակել, որում Ստամբուլի Սբ. Սոֆիայի տաճարի գլխին խաչ էր պատկերված: Եսայանն այս արարքը ամոթալի էր որակել:

Ի դեպ Մարգար Եսայանը 1915 թ. ապրիլին հայ մտավորականներին ձերբակալելու և մահվան աքսորելու ցուցակը կազմած հայ դավաճան Վահե Իհսանի (Եսայան-նրան «Նեմեսիս» գործողության շրջանակներում սպանել է հայ անվանի վրիժառու Արշավիր Շիրակյանը) ժառանգներից է: