Ադըյամանի «Արսեմիա» հնավայրը փակվել է առաջացած ճեղքերի պատճառով․ «Հյուրիեթը» շեշտում է հնավայրի հայկական լինելու փաստը

Ներկայիս Թուրքիայի Հանրապետության տարածքում գտնվող Ադըյաման նահանգի Քահթա գավառում՝ Նեմրութ լեռան մոտակայքում պահպանվող «Արսեմիա» հնավայրը զբոսաշրջիկների համար փակվել է՝ առաջացած ճեղքերի հետևանքով։ Այդ մասին, ըստ Yerkir.am-ի, հաղորդում է Akunq.net-ը՝ թուրքական «Հյուրիեթ» պարբերականի հղումով։

Աղբյուրի համաձայն՝ հնավայրի տնօրինությունը հետազոտություն է սկսել Քահթայի բերդի դիմաց գտնվող «Արսեմիա» հնավայրում, որտեղ պահպանվում են հայկական թագավորություն եղած Կոմմագենեի հետքերը։

Չեղքերի առաջացման պատճառով հնավայրը ժամանակավորապես փակած մասնագիտական խումբը մի ցուցանակ է դրել, որում նշված է, թե «այդ տարածք մուտք գործելը վտանգավոր է և արգելված»։ Լուրում հաղորդվում է նաև, որ հնավայրը վերստին կբացվի՝ անհրաժեշտ աշխատանքների իրականացումից հետո։

Ուշագրավ է, որ հրապարակման մեջ «Հյուրիեթ» օրաթերթը շեշտում է Կոմմագենեի հայկական թագավորություն լինելու փաստը։

Թարգմանեց Մելինե Անումյանը