Ադրբեջանում տղամարդը վառել է կնոջը՝ անլվա սպասքի համար

Բաքվի առանձնապես ծանր հանցագործությունների դատարանում ավարտվել է 39-ամյա Ջեյհուն Խուդաբահշիևի դատական գործը, ով մեղադրվում է կնոջը վառելու մեջ: Դեպքը տեղի է ունեցել ապշերոնյան թերակղզու վրա գտնվող Մաշթաղա ավանում անցյալ տարվա մայիսի 5-ին: Այս մասին, ըստ Yerkir.am-ի, հայտնում է haqqin.az կայքը:

Միջընտանեկան վեճի ժամանակ Ջեյհունը կնոջ վրա բենզին է լցրել ու վառել: Կինը ծանր այրվածքներով տեղափոխվել է հիվանդանոց:

Հարցաքննության  ժամանակ մեղադրյալը նշել էր, որ կնոջ հետ վիճաբանել էր այն բանի պատճառով, որ կինը չէր մաքրել տունը: Նա որդուն ուղարկել էր բենզին գնելու, իսկ կնոջը հայտարարել, որ վառելու է տունը: Երբ երեխան բերեց բենզինը, Ջեյհունը այն սկսեց լցնել տան մեջ, որին միջամտեց կինը՝ Ռազիյան: Տղամարդը հրեց կնոջը, որն էլ դիպչեց էլեկտրական տաքացուցիչին, ինչից հետո սկսեց վառվել:

«Գիշերը նա արթնացրեց ինձ բղավոցներով, բռնեց մազերիցս և տարավ լվացարանի մոտ: Ասացի՝ նոր եմ եկել գիշերային հերթապահությունից, հիմա կանեմ: Բայց ինձ չլսեց և այդ ամենը տեղի ունեցավ», - նշել է Ռազիյան:

Դատարանում երեխաները ևս հայտարարել էին, որ նրանց հայրը ծեծում էր մորը: Ջեյհունը դատապարտվեց 9 տարի ազատազարկման: