ՏԵՍԱՆՅՈԻԹ. Չիկագոյի այգիներից մեկում Հայաստանի ուղղությունը ցույց տվող ցուցանակ է տեղադրվել

Չիկագոյի Նորթ Ուաբբաս պողոտայի Քոննորս այգին շարունակում է «հայկականացվել». գրում է mirrorspectator.com-ը:

Չիկագոյում, ՀՀ հյուպատոսության հովանավորությամբ, «Բիզնես-Հայաստան» ծրագրի նախաձեռնությամբ և տեղի հայկական համայնքի աջակցությամբ, դեռևս անցյալ տարի այգում տեղադրվել էին Հայաստանում պատրաստված նստարաններ՝ «Չիկագո-Երևան» գրությամբ: Դրանք նույն տեսք ունեն, ինչ Երևանում և Արցախում տեղադրվածները:

Օրերս նոր ծրագիր է գործարկվել. տեղադրվել են ցուցանակներ, որոնք հուշում են Չիկագոյից տարբեր քաղաքների հեռավորությունները: Այս ցուցանակների շարքում Լոնդոնի, Փարիզի, Հռոմի, Լոս Անջելեսի, Վաշինգտոնի կողքին կարելի է տեսնել նաև Երևանի ցուցանակը (6060 մղոն):

Չիկագոյում ՀՀ պատվո հյուպատոս Օսկար Թաթոսյանը, խոսելով գաղափարի մասին, մանրամասնել է, որ սա շարունակությունն է այն գործի, որ իրենք սկսել են նստարանների տեղադրմամբ: «Սրանով մենք ցույց ենք տալիս մարդկանց, որ աշխարհը շատ փոքր է, և խրախուսում ենք նրանց այցելել Հայաստան»,- հավելել է նա:

Ի դեպ, այգին հայտնի է նաև հնագույն թեյերից մեկի՝ «Արգո» թեյի խանութով: Այն բացվել է դեռևս 2003-ին հայ և ամերիկացի երկու գործարարների կողմից: Որոշ ժամանակ անց այն հայտնի է դարձել «Starbucks of teas» (թեյերի սթարբաքս) անունով: