Նորակոչիկները զինվորական երդում են տվել Սարդարապատում

Օգոստոսի 3-ին Սարդարապատի հուշահամալիրում N զորամասի նորակոչիկները տվեցին իրենց զինվորական երդումը:

Արարողությանը իրենց ներկայությունն էին բերում զորամասի հոգևոր սպասավորները, սպաներ և զինվորականներ, զինվորների ընտանիքները ու հարազատները:

Ի թիվս բազմաթիվ բարեմաղթանքների, որոնք ուղղված էին երդվյալ զինծառայողներին, իր օրհնության խոսքը և բարեմաղթանքները ներկաներին փոխանցեց զորամասի ավագ գնդերեց Արժանապատիվ Տեր Արիս քահանա Խաչատրյանը: Բաշխելով իր օրհնությունը և բարեմաղթանքները զինծառայողներին՝ Արժանապատիվ Տեր Հայրը նշեց. «Սիրելի զինվորներ այսօր դուք ձեր երդումով ևս մեկ անգամ ամրագրեցիք այն ճշմարտությունը, որ պահապանն ու պաշտպանն եք մի ժողովրդի, որն իր մեջ բյուրեղացնում է դարավոր պատմություն. Պատմություն փառքի և հաճախ նահանջի: Սակայն այսօր մեզանից է կախված, թե մեր ապագան ինչպիսի ներկայի ու պատմության կվերածվի: Սիրելիներ ուստի մաղթանքս է որպեսզի այս պահին ձեր կողմից տրված երդումը դառնա զինվորական ծառայության հավատամք»: 

Տեր Հայրը, անդրադառնալով ազգի, հայրենիքի առաջ ծառացած մարտահրավերներին, պատգամեց սպառազինվել համբերատարությամբ և մտքի ու մարմնի տոկունությամբ՝ ամեն վայրկյան հայցելով Աստծո օգնականությունը, ապա նշեց. «Այս մարտահրավերների հաղթահարման առհավատչյան Հայոց բանակն է իր անկոտրում և հավատավոր զինվորներով ու սպաներով: Ուստի շատ կարևոր է, որ Հայոց բանակի յուրաքանչյուր օղակ համակվի աստվածային ներդաշնակությամբ՝ դառնալով ամբողջական շղթայի ներդաշնակ մասնիներից հերթականը»: