Երրորդ քայլը կարող է լինել ավելի հատու. Իրանի ԱԳՆ խոսնակ

Իրանն ուսումնասիրում է Միջուկային համապարփակ համաձայնագրով ստանձնած իր պարտավորությունները կրճատելուն ուղղված երրորդ քայլը, որը կարող է լինել ավելի հատու, եթե, իհարկե, եվրոպական երկրները շարունակեն բավարարվել միայն խոսքերով: Այս մասին այսօր լրագրողների հետ հանդիպման ժամանակ տեղեկացրել է Իրանի ԱԳՆ պաշտոնական ներկայացուցիչ Սեյեդ Աբբաս Մուսավին. հաղորդում է ԻՌՆԱ-ն:

Անդրադառնալով առաջիկայում նախատեսվող դիվանագիտական իրադարձություններին եւ շփումներին՝ Իրանի ԱԳՆ մամուլի խոսնակն ասել է. «Երկկողմ հարաբերությունները, տարածաշրջանային ու միջազգային շփումները շարունակվում են: Առջեւում Չմիավորված երկրների շարժման հերթական նիստն է, որին կմասնակցի Իրանը: Հնարավոր է, որ առաջիկա օրերին կրկին Թեհրան այցելի Ֆրանսիայի նախագահի` դիվանագիտական հարցերով  խորհրդականը»:

Խոսելով Միջուկային համապարփակ համաձայնագրի վերաբերյալ Ռուսաստանի եւ Չինաստանի դիրքորոշման մասին՝ Մուսավին հստակեցրել է, որ խնդրի հետ կապված Իրանը բացառապես սեփական ուժերին է ապավինում:

«Իրանը հույսեր չի կապում որեւէ երկրի հետ` լինի մեր բարեկամ Ռուսաստանը կամ Չինաստանը, կամ էլ` եվրոպական երկրները: Կարեւորը Միջուկային համապարփակ համաձայնագրով ստանձնած պարտավորությունների լիարժեք եւ ամբողջական իրականացումն է: Ռուսաստանը եւ Չինաստանը նույնպես Միջուկային գործարքի կողմերից են, եւ համաձայնագրի կողմերի ղեկավարներին ուղղված` հանրապետության նախագահի նամակը նրանց էլ է վերաբերում»,- ասել է Իրանի ԱԳՆ խոսնակը:

Մուսավին բացառել է Միջուկային համապարփակ համաձայնագրի հարցով նոր բանակցությունների անցկացումը՝ նշելով. «Նոր բանակցությունների մասին խոսք լինել չի կարող: Միջուկային գործարքը 5+1 եւ 4+1 ձեւաչափերով շարունակվել է: Խոսքը միայն կողմերի ստանձնած պարտավորությունների լիարժեք իրականացման մասին է, այլ թեմաների մասին բանակցությունները բացառված են: Ինչպես պարոն Արաղչին է ասել՝ Միջուկային համապարփակ համաձայնագիրը բանակցությունների համար փակված թեմա է: Դրան ոչ մի բառ հնարավոր չէ ավելացնել կամ պակասացնել»:

Անդրադառնալով Իրանի՝ Միջուկային գործարքով ստանձնած պարատավորությունների կրճատմանն ուղղված երկրորդ քայլին՝ Իրանի ԱԳՆ մամուլի խոսնակը նշել է, որ դա տեւելու է 60 օր, որից հետո Իրանը որոշում կկայացնի երրորդ քայլի մասին, որն, ի դեպ, կարող է լինել ավելի հատու:

«Երրորդ քայլին կդիմենք 60 օրից: Դեռեւս ուսումնասիրում ենք: Սակայն, եթե գործարքում մնացած երկրները, հատկապես՝ եվրոպացիները շարունակեն բավարարվել միայն խոսքերով, ապա երրորդ քայլը կլինի ավելի հատու»,- հստակեցրել է Մուսավին: