Թյուրիմացություն է եղել. ԿԳՄՍ նախարարը`Տավուշի մարզից ժամանած դպրոցականների հետ տեղի ունեցած միջադեպի մասին

Թյուրիմացություն է եղել.  ասաց կրթության, գիտության, մշակույթի և սպորտի նախարար Արայիկ Հարությունյանը քննակենտրոն այցի ժամանակ`  անդրադառնալով Տավուշի մարզից ժամանած դպրոցականների հետ տեղի ունեցած միջադեպին, երբ նրանք ցանկացել են այցելել թանգարան, սակայն նրանց չեն թույլատրել՝ նշելով, որ տոմսերը չեն գործում:

«Մենք թանգարաններին նորից կզգուշացնենք: Օնլայն գրանցմամբ մշակութային կենտրոններ գնալու հնարավորությունն ուժի մեջ է լինելու մինչև հուլիսի 30-ը, որովհետև համակարգն ուշ ենք գործարկել: Քանի որ թանգարանների դեպքում մեկնարկեց դեկտեմբերին, իսկ թատրոնների դեպքում` ապրիլին, հետևաբար`  ժամկետը երկարացրեցինք մինչև հուլիսի 30-ը: Սա` այս տարվա համար, իսկ հաջորդ տարիներին կմեկնարկի սեպտեմբերին և կգործի մինչև մայիս»,- պարզաբանեց նախարարը:

Ինչ վերաբերում է տոմսերի` ամռան ամիսներին գործելու հավանականությանը, նախարարը հավելեց, որ այդ հարցը ևս կքննարկեն:

Հավելենք, որ այսօր դիմորդները միասնական քննություն են հանձնում «Ֆիզիկա» առարկայից, ինչի համար էլ ԿԳՄՍ նախարարն այցելել էր քննակենտրոն:

Ավելի վաղ տեղեկացրել էինք, որ աբոնեմենտի շնորհիվ ուսումնական տարվա ընթացքում յուրաքանչյուր աշակերտ հնարավորություն կստանա մեկ անգամ անվճար այցելելու երեք մշակութային հաստատություն: