Բանը, ը~, թյուրիմացություն ա եղել. Սուրենյանցը` իրեն ծեծելու մասին

Քաղաքագետ Սուրեն Սուրենյանցն անգամ ոստիկանության պաշտոնական արձագանքից հետո կտրականապես հերքում է, որ վիճաբանություն է տեղի ունեցել իր և ԲՀԿ-ական պատգամավոր Վահան Կարապետյանի հետ,  և որ պատգամավորը հարվածել է իրեն:

Հիշեցնենք, որ, ըստ ոստիկանության, դեկտեմբերի 14-ին` ժամը 18:00-ից 19:00 ընկած ժամանակահատվածում, «Չերի» հյուրանոցային համալիրում Վ.Կ-ն ձեռքով հարվածել է Ս.Ս.-ին: Փաստի առթիվ ոստիկանության Մալաթիայի բաժնում նյութեր են նախապատրաստվում, նշանակվել է դատաբժշկական փորձաքննություն, կատարվում է հետաքննություն:

Yerkir.am-ի հետ զրույցում քաղաքագետը նշեց, որ պատգամավորն իրեն ձեռքով չի հարվածել, և որ այդ մասին ոստիկանությունը տեղյակ է:

«Մենք պարոն Կարապետյանի հետ ընկերներ ենք, մեր մեջ եղել է զրույց, կարող ա զրույցը մի քիչ բարձր տոնով ա եղել, բայց մենք իրար հետ ոչ մի խնդիր չունենք»,- ասաց նա և հավելեց, որ ինքն արդեն ոստիկանությանը հայտնել է, որ Կարապետյանի դեմ որևէ բողոք չունի, քանի որ իրենց միջեւ ոչ մի լուրջ միջադեպ չի եղել:

«Ենթադրյալ տուժողը ես եմ և ասում եմ, որ որևէ բողոք չունեմ: Կարող եք Կարապետյանի հետ խոսել, նա էլ կասի, որ ոչինչ չի եղել»,- շարունակեց նա, նաեւ տեղեկացրեց, որ Կարապետյանի հետ շատ վաղուց են ընկերներ` դեռևս Ղարաբաղյան պատերազմի տարիներից. «Երեկ շատ երկար զրույց ենք ունեցել, շատ բարեկամական բաժանվել ենք` որպես շատ հարազատ մարդիկ»:

Դիտարկմանը` այդ դեպքում ինչո՞ւ և ո՞վ է զանգահարել ոստիկանություն, Սուրենյանցը նախ կմկմաց, հետո պատասխանեց. «Բանը, ը~, թյուրիմացություն ա եղել, մեր ոստիկանությունը արձագանքել է, անհրաժեշտ պարզաբանում տվել է»:

Մենք փորձեցինք կապ հաստատել նաև Վահան Կարապետյանի հետ, սակայն նա, լսելով հարցը, ասաց, որ զբաղված է և անջատեց հեռախոսը: