Մենք Վենեսուելայում ռազմաբազա չունենք, զորք չենք ուղարկել. Պուտին

ՌԴ նախագահ Վլադիմիր Պուտինը հայտարարել է, որ հնարավոր է` ռուսաստանցի մասնագետների մի մասն ավարտել  է իր պարտականությունների կատարումը Վենեսուելայում և լքել երկիրը. հայտնում է РИА Новости-ն:

Այդ մասին նա ասել է միջազգային տեղեկատվական գործակալությունների ղեկավարների հետ հանդիպման ժամանակ` Պետերբուրգի միջազգային տնտեսական ֆորումի շրջանակում:

«Նրանցից ոմանք լքել են երկիրը, ոմանք, հնարավոր է, ժամանել: Մենք հատուկ ոչինչ չենք ստեղծում, ոչ մի հենակետային ռազմաբազա, զորք չենք ուղարկում այնտեղ: Դա երբեք չի եղել»,- ասել է Պուտինը:

Հիշեցնենք, որ օրերս ԱՄՆ նախագահ Դոնալդ Թրամփն ասել էր, որ Ռուսաստանն իր մարդկանց  մի մասին դուրս է բերել Վենեսուելայից: