Բանակը չի կարող լինել առուծախի, ժողովրդավարությունն առաջ տանելու, զինվորի ձայնը բարձրացնելու տեղ. ադրբեջանագետ

Բանակը չի կարող լինել առուծախի, ժողովրդավարությունն առաջ տանելու, զինվորի ձայնը բարձրացնելու տեղ. Yerkir.am-ի հետ զրույցում ասաց ադրբեջանագետ Տարոն Հովհաննիսյանը՝ անդրադառնալով Մեղրիի զորամասերից մեկում տեղի ունեցած միջադեպին, երբ զինծառայողներն ինքնակամ լքել են զորամասը՝ այդպիսով հայտնելով իրենց բողոքը, որից հետո մի խումբ զինծառայողների մարտի 17-ին տեղափոխել են Կապանի, ապա` Ստեփանակերտի կարգապահական զորամասեր, այնուհետև տարել են առաջնագիծ: 

«Բանակում պետք է լինի հստակ կարգուկանոն, սուբորդինացիա՝ ըստ աստիճանակարգերի, և շարքային զինծառայողները պետք է ենթարկվեն իրենցից բարձր կոչում և դիրք ունեցող անձանց՝ սերժանտներ, սպաներ, նրանք էլ` իրենց վերադասին: Ես բողոքներ եմ լսում ծնողներից, թե ինչու են տեղափոխում Արցախ, նախ՝ Արցախը պատժի ուղարկելու տեղ չէ, նույնպիսի սահման է, ինչպիսին ՀՀ  ԶՈւ-ի կողմից պահվող սահմանը, այնտեղ ծառայում են հայ զինվորները, եզդիները, մեր քաղաքացիները, և ոչ ոք մյուսից լավը չէ: Պետք է հստակ ամրագրվի՝ բանակում պիտի լինի կարգ և կանոն, և ոչ ոք դրսից՝ թեկուզ լինի ծնող, չի կարող խառնվել այդ ներքին գործընթացներին և փորձել լարել իրավիճակը: Եթե իրականացրել են կարգի խախտում, ապա այդ զինծառայողները պետք է համապատասխան պատասխանատվության ենթարկվեն: Նրանք բանակի զինծառայողներ են, երբ մտնում են բանակ, ենթարկվում են այդ կարգուկանոնին: Իրավիճակը պետք է կարգավորվի այդ տրամաբանությամբ, հակառակ դեպքում՝ մեր հակառակորդին դրական ազդակներ ենք տալիս, որ կարգուկանոնի խախտում կա: Եվ այստեղ իրավիճակի տերը պաշտպանության նախարարությունն է, և ոչ մի այլ կառույց, հասարակական կազմակերպություն, ծնող իրավունք չունեն խառնվելու այս գործընթացին, այլապես սա շատ վատ նախադեպ կարող է լինել: Բոլոր երկրների բանակներում ՊՆ-ն է որոշում՝ ինչ պետք է անի կարգազանց զինծառայողների հետ, ինչպես պետք է հետաքննությունը վարվի, ինչ միջոցառումներ պետք է արվեն: Կրկնում եմ՝ ՊՆ-ն և ԳՇ-ն են որոշում, թե զինծառայողները որ մասում պիտի ծառայեն: Ի վերջո, վիճակահանությունը դեռ չի նշանակում, որ մեկը մինչև վերջ պետք է այդտեղ ծառայի. ըստ անհրաժեշտության` ցանկացած զինծառայող կարող է տեղափոխվել մեկ այլ վայր»,- ամփոփեց Հովհաննիսյանը:

Հավելենք, որ Մեղրիի տարածքում տեղակայված ՀՀ ՊՆ զորամասերից մեկում գրանցված միջադեպի փաստի առթիվ հարուցվել է երկու քրեական գործ: Այս մասին Yerkir.am-ի հետ զրույցում ասաց ՀՀ գլխավոր դատախազության հանրային կապերի բաժնի պետ Արևիկ Խաչատրյանը: «Գորիսի դատախազ Սերգեյ Խաչատրյանի կողմից հարուցվել է  երկու քրեական գործ: Մեկ գործ  հարուցվել է ՀՀ ՔՕ-ի 364-րդ հոդվածի 2-րդ մասով, մյուսը` ՀՀ ՔՕ-ի 375-րդ հոդվածի 1-ին մասով»,- ասաց նա:

Քրեական գործերը հարուցվել են զինվորական ծառայության պարտականությունները կատարելուց հրաժարվելու և իշխանությունը չարաշահելու հատկանիշներով: