Թուրքիայի խորհրդարանը «Խոջալուի դեպքերի» հետ կապված հայտարարություն է տարածել

Թուրքիայի Ազգային մեծ ժողովի (ԹԱՄԺ-TBMM) արտաքին հարաբերությունների հանձնաժողովը, այսպես կոչված, «Խոջալուի դեպքերի» տարելիցի կապակցությամբ հայտարարություն է տարածել. հաղորդում է ermenihaber.am կայքը:

Դատապարտող հայտարարության մեջ տեղ է գտել հետևյալ ձևակերպումը. «ՀՀ ստորաբաժանումների կողմից իրականացված կոտորածը և Ադրբեջանի տարածքների բռնազավթումը»:

Նշվել է, որ նման դեպքերի կրկնությունը բացառելու համար միջազգային հանրությունը, ՄԱԿ-ի Անվտանգության խորհուրդը, ԵԱՀԿ-ն, Իսլամական համագործակցության կազմակերպությունը պետք է տեղի ունեցածի գնահատականը տան:

Հայտարարության մեջ ևս մեկ անգամ տուրք է տրվել զոհերի, վիրավորների, գերիների և անհայտ կորածների մասին ադրբեջանական շինծու թեզերին, Խոջալուի դեպքերն անվանվել են «մարդկության պատմության ամենասև էջերից մեկը»:

Ընդգծվել է, որ Թուրքիան սատարում է ադրբեջանցի եղբայրներին նրանց «արդարացի դատի» հարցում: Կրկին կոչ է արվել, որ այս դեպքերի մեղավորները միջազգային դատարանի առաջ կանգնեն, իսկ Հայաստանն էլ «Ադրբեջանի բռնազավթված տարածքներից» րոպե առաջ դուրս գա:

Նշենք, որ այսօր նմանատիպ հայտարարություն էր տարածել նաև Իսլամական համագործակցություն կամզակերպությունը` հայերին մեղադրելով տարածք բռանազավթելու և ցեղասպանություն իրագործելու մեջ: