Նազարբաևը կառավարության նոր ղեկավար է նշանակել

Ղազախստանի նախարարների կաբինետը գլխավորել է Ասքար Մամինը, որն ավելի վաղ նշանակվել էր երկրի վարչապետի պաշտոնակատար: Համապատասխան հրամանը ստորագրել է երկրի նախագահ Նուրսուլթան Նազաբաևը. հայտնում է РИА Новости-ն:

Մամինը 53 տարեկան է, տարբեր ժամանակահատվածներում եղել է երկրի տրանսպորտի և կոմունիկացիաների նախարար:

Նազարբաևն օրերս հայտարարել էր երկրի կառավարության հրաժարականի մասին: «Ես` որպես նախագահ, Սահմանադրության երաշխավոր, հաշվի առնելով մեր ժողովրդի շահերը, կայացնում եմ հետևյալ որոշումը: Կարծում եմ, որ կառավարությունը պետք է հրաժարական տա: Նոր կառավարությունը պետք է մշակի արդյունավետ քայլեր` կյանքի մակարդակը բարձրացնելու, տնտեսությունը խթանելու, ռազմավարական խնդիրները իրականացնելու համար»,- ասվում էր Նազարբաևի կայքում հրապարակված հայտարարությունում:

Նա նշել էր, որ կառավարությունն Ազգային բանկի հետ  այդպես էլ չկարողացավ տնտեսության որակյալ աճի  համար խթան և գործիքներ ստեղծել: