ՄԽ-ի և տարածաշրջանի երկրների ջանքերի շնորհիվ ԼՂ հակամարտության գոտում լարվածությունը նվազել է. ՀԱՊԿ միավորված շտաբի պետ

ԵԱՀԿ ՄԽ համանախագահների և տարածաշրջանի երկրների համատեղ ջանքերը հանգեցրել են լարվածության նվազման Ղարաբաղյան հակամարտության գոտում, ինչն իր հերթին հնարավորություն է տվել  ակտիվացնելու երկխոսությունը, որն անհրաժեշտ է Ղարաբաղյան հակամարտության խաղաղ կարգավորմանն ուղղված հետագա աշխատանքի համար։ Այս մասին Մոսկվա-Երևան-Մինսկ-Բիշքեկ-Աստանա տեսակամրջի ընթացքում ասաց  ՀԱՊԿ միացյալ շտաբի պետ, գեներալ-գնդապետ Անատոլի Սիդորովը:

«Հայաստանի և Ադրբեջանի ղեկավարների պարբերական հանդիպումները հնարավորություն են տվել հասնելու որոշակի պայմանավորվածությունների՝ միտված  վստահության ամրապնդմանը և բանակցային խաղաղ գործընթացի համար անհրաժեշտ պայմանների ստեղծմանը: Վերջին տասնամյակներում  առաջին անգամ բարձր մակարդակով ուղիղ կապ է հաստատվել Հայաստանի և Ադրբեջանի միջև»,-ընդգծեց նա՝ հավելելով որ, այնուամենայնիվ, Հավաքական անվտանգության կովկասյան տարածաշրջանում պահպանվում է բարդ իրադրություն, ինչը, նախևառաջ, պայմանավորված է սահմաններին մոտ բարձր կոնֆլիկտային պոտենցիալի առկայությամբ, ինչպես նաև ԱՄՆ-ի և Արևմուտքի՝ տարածաշրջանում ազդեցությունը ամրապնդելու ձգտմամբ: