Պարգևավճարներն առաջին հերթին տրվել են մարտական հերթապահություն իրականացնողներին, դրանք գոյացել են խնայողություններից

Անցյալ տարվա ընթացքում բավական մեծ ծավալի ֆինանսներ ենք տրամադրել պարգևավճարների համար, որոնք գոյացել են պաշտպանության նախարարության խնայողություններից, դրանք չեն ուղղվել ինչ-ինչ ձեռքբերումների, այլ տրամադրվել են անձնակազմին՝ որպես հավելավճար: Այս մասին Եռաբլուրում լրագրողների հետ ճեպազրույցում ասաց ՀՀ պաշտպանության նախարար Դավիթ Տոնոյանը:

«Առաջին հերթին տրամադրվել է մարտական հերթապահության մեջ ընդգրկված անձնակազմին, ընդ որում, եթե չեմ սխալվում, երկու անգամ», - նշեց նա։

Անդրադառնալով իր խորհրդական Էնրիկո Ապրիամովի վերաբերյալ մամուլի հրապարակումներին, թե նա 2008 թվականին շրջում էր վաշտ առ վաշտ և զինվորականներին կարգադրում ընտրել Սերժ Սարգսյանին, պաշտպանության նախարարն ասաց, որ ինքը նման տեղեկություն չունի, կարդացել է նախկին զինծառայողներից մեկի այդ հայտարարությունը, որը ստուգման կարիք ունի։ «Շատերը կարող են ասել: Դրա համար կան համապատասխան մարմիններ, թող զբաղվեն», - շեշտեց նախարարը։

Հարցին, թե  զինված ուժերի հեղինակությանը հարվածո՞ւմ են հարուցված քրեական գործերը, Դավիթ Տոնոյանը պատասխանեց. 
«Իհարկե, դա զինված ուժերի տրամադրության վրա ազդում է, բայց, ինչպես ասացի, հաղթահարում ենք և անում առավել, քան հնարավոր է»: