Բաղրամյան 26-ը նախագահին վերադարձնող նախագիծն ԱԺ-ն ընդունեց առաջին ընթերցմամբ

Տեղեկացրել էինք, որ Ազգային ժողովն առաջին ընթերցմամբ մի շարք օրենքներ ընդունեց: Դրանցից մեկով` «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրինագծով, Բաղրամյան 26-ը վերադարձվեց ՀՀ նախագահին:

Հիմնական զեկուցող` արդարադատության փոխնախարարի պաշտոնակատար Արթուր Հովհաննիսյանը հիշեցրեց, որ այս տարվա ապրիլին փոփոխված նախագծով ստացվեց, որ ՀՀ վարչապետը ստացավ երկու նստավայր: Նա նշեց, որ առաջարկում են Հայաստանի նախագահի նստավայրը Երևանի Բաղրամյան 26 հասցեում գտնվող շենք տեղափոխել Մաշտոցի 47 հասցեից, իսկ վարչապետի նստավայրը՝ Բաղրամյան 26-ից` Հանրապետության հրապարակ, կառավարական տուն 1:

«Կառավարությունը, վարչապետի գլխավորությամբ, համարում է, որ վարչապետը կառավարության գործունեության ղեկավարումը կարող է իրականացնել մեկ նստավայրի միջոցով»,-ասաց նա: 

Ըստ Հովհաննիսյանի` կառավարությունը նաև համարում է, որ պատմական նշանակություն ունեցող Բաղրամյան 26 շենքը, որը 1992-ից ծառայել է որպես ՀՀ նախագահի նստավայր, պետք է վերադարձնել ՀՀ նախագահին, որը, ըստ Սահմանադրության, հանրապետության գլուխն է և Սահմանադրությունն ապահովող մարմինը: 

Հարցի քննարկումից հետո նախագիծը դրվեց առաջին ընթերցմամբ քվեարկության և ընդունվեց ձայների` 55 կողմ, 0 դեմ և 2 ձեռնպահ համամասնությամբ: