Խորհրդարանն առաջին ընթերցմամբ ընդունեց ներման մասին օրենքը. այդ իրավունքը վերապահված է վարչապետին

Խորհրդարանն ընդունեց «Ներման մասին» օրենքը ձայների` 67 կողմ, 18 դեմ և 5 ձեռնպահ հարաբերակցությամբ: Հիշեցնենք, որ համաձայն «Ներման մասին» օրենքի՝ վարչապետը հանրապետության նախագահին ներկայացնում է ներման խնդրագիր՝ ներկայացրած անձին ներում շնորհելու կամ ներման շնորհումը մերժելու մասին առաջարկություն:

Նախագահը եռօրյա ժամկետում կարող է ստորագրել համապատասխան հրամանագիր կամ առարկություններով վերադարձնել վարչապետին: Այս պարագայում վարչապետը կա՛մ ընդունում է առարկությունները, խմբագրում նախագիծը, կա՛մ չի ընդունում՝ կրկին ներկայացնելով նախագահին: Այս դեպքում նախագահը կա'մ պետք է ստորագրի, կա'մ դիմի ՍԴ:

ԱԺ «Ելք» խմբակցության ղեկավար Նիկոլ Փաշինյանը վարման կարգով ելույթ ունեցավ և նշեց, որ այս որոշումով ՀՀԿ-ն ցույց է տալիս, որ Սերժ Սարգսյանին վարչապետի թեկնածու առաջադրելու ներքին որոշում ունի:

Խմբակցության մեկ այլ պատգամավոր` Արտակ Զեյնալյանը, նշեց, որ ներման իրավունքը շնորհված է նախագահին, մինչդեռ առաջարկվող օրենքով նախագահը զրկվում է այդ իրավունքից և ձևական բնույթ կրում, ուստի իրենք դեմ կքվեարկեն նախագծին:

«Ծառուկյան» խմբակցության քարտուղար Վահե Էնֆիաջյանն էլ ասաց, որ նախագիծը Սահմանադրության հետ կապված խնդիրներ ունի, և խմբակցության պատգամավորներն ազատ են քվեարկելու: