Գրեթե չեն լինում դեպքեր, որ գումարի պատճառով բուժօգնություն չստանան ու մահանան. Արսեն Թորոսյան

Նման մահերի վիճակագրություն դժվար է հավաքել, թեև նման դեպքեր գրեթե չեն լինում. լրագրողներին ասաց ՀՀ առողջապահության նախարարի պաշտոնակատար Արսեն Թորոսյանը՝ պատասխանելով հարցին, թե կա՞ վիճակագրություն՝ քանի մարդ է մահանում այն պատճառով, որ չի կարողանում վճարել անհրաժեշտ գումարը, որպեսզի շտապ բուժօգնություն ստանա:

Թորոսյանի խոսքով՝ ավելի հաճախ լինում է, որ մարդուն վիրահատում են, ու նա կամաց-կամաց փակում է գումարը: «Կառավարության դերը հետևյալն է` այնպիսի մեխանիզմ լինի, որ, անկախ այդ պահին հիվանդի մոտ առկա գումարի չափից, ծառայությունը մատուցվի, որից հետո հիվանդի կողմից վճարումների միջոցով այդ հարցը կլուծվի: Սա կոչվում է ապահովագրություն: Քանի դեռ մենք չունենք ապահովագրություն, բուժհաստատությունից պահանջել անվճար բուժօգնություն, որի համար ոչ ոք նրան չի վճարում, այնքան էլ ճիշտ չէ: Հիվանդանոցները պարզապես կփակվեն»,- ասաց Թորոսյանը:

Նա նշեց նաև, որ հիմնականում անհատական լուծումներ են տրվում՝ լինում են դեպքեր, որ նախարարություն են դիմում, ու իրենք էլ տնտեսված միջոցների հաշվին փորձում են ինչ-որ գումար վճարել: Թորոսյանի խոսքով՝  իրենց խնդիրն է ունենալ այնպիսի համակարգ, որ չհասնեն այն իրավիճակին, երբ մարդը մնա առանց բուժօգնության՝ ինչ է, թե գումար չունի: «Մենք ինդիվիդուալ չենք կարող բոլորի հարցերը լուծել, պարզապես այդքան գումար չունենք»,- հավելեց նա: