ԱԺ արտահերթ ընտրություններին դեմ արտահայտվող ուժերը պետք է ձայն չստանան ընտրություններում. Նիկոլ Փաշինյան

Այսօր Երեւանի Մալաթիա-Սեբաստիա համայնքում «Իմ քայլը» դաշինքի նախընտրական հանրահավաքի ժամանակ ելոււյթ ունեցավ ՀՀ վարչապետ Նիկոլ Փաշինյանը` անդրադառնալով ներքաղաքական հարցերի:

Նա հայտարարեց, որ ԱԺ արտահերթ ընտրություններին դեմ արտահայտվող ուժերը պետք է ընդհանրապես  ձայն չստանան այս ընտրություններում:

Ըստ Փաշինյանի, որոշ խորհրդարանական ուժեր հայտարարում են, որ չեն աջակցելու իրեն` արտահերթ խորհրդարանական ընտրությունների ժամանակ: Եվ վարչապետի համոզմամբ` արտահերթ խորհրդարանական ընտրությունների մասին որոշումը կայացրել է  ժողովուրդը, և ով այդ որոշմանը դեմ գնաց, կկնքի  իր քաղաքական մահկանացուն, որովհետեւ նրանք դեմ են ժողովրդին:

Ինչ վերաբերում է ՀՀԿ-ի հայտարարություններին, որ ՀՀԿ-ն նպատակահարմար չի զգում արտահերթ խորհրդարանական ընտրությունների անցկացումը, Փաշինյանը ասաց. «Հլը մի հատ ձեզ թափ տվեք, տեսնենք՝ ձեր որ մասը որ կողմը կընկնի,  դուք ո՞վ եք, որ նպատակահարմար գտնեք»:

Փաշինյանը նաև հայտարարեց, որ որոշ քաղաքական ուժեր բեմերից իր անունն են տալիս, սակայն հետո գնում, բակերում բանակցում են ՀՀԿ-ի ընտրակեղծարարների հետ: