Այսօր ստերի բացահայտման օր է. առողջապահության նախարար

Այսօր ստերի բացահայտման օր է. լրագրողների հետ զրույցում մի շարք դեպքերին  իր անդրադառնալն այսպես բնութագրեց ՀՀ առողջապահության նախարարի պաշտոնակատար Արսեն Թորոսյանը:

Նա նշեց, որ Մասիվի ԲԿ-ի պաթանատոմիական մասնաշենքում, օրինակ, մի վարձակալ կար, որը 100 000 դրամով երկարատև տարիներ սգո ծառայություններ է մատուցել: Թորոսյանի խոսքով՝ իրեն մեղադրում են, որ իր ընկերոջն է տարածքն այժմ տալիս վարձակալության: «Մենք այդ տարածքը վարձով տվել ենք մեկ այլ ընկերության`5 մլն դրամով, ու հիմա նախկինում 100 000 դրամ տվողը մեզ տեռորի է ենթարկում ու ասում, թե ինչու ենք մենք նրան այնտեղից հանել: Եվ սա այն դեպքում, երբ Մասիվի հիվանդանոցը ֆինանսական խնդիրներ ունի, քանի որ այլևս հավելագրումներ չի կարողանում կատարել ու պետք է իրեն պահի»,-ասաց Թորոսյանը:

Խոսելով հիվանդանոցի կադրային շարժի մասին՝ նա հավաստիացրեց, որ մինչ օրս ոչ մի կրճատում չի եղել, սակայն եղել է պայմանագրային հարաբերությունների ճշտում: «Անհասկանալի է, թե մինչ օրս ամեն ինչ ինչի հիման վրա է եղել: Մարդկանց հետ կնքվում են նոր պայմանագրեր, և եթե կարիք լինի կրճատումների, իհարկե, դրանք կլինեն: Սակայն որևէ մասսայական կրճատում չի եղել մինչ օրս»,- ասաց Թորոսյանը: