Ռոբերտ Քոչարյանին վերաբերող ցանկացած գործով ցանկացած բացահայտում լինելու է նրա օգտին. Վիկտոր Սողոմոնյան

ՀՀ 2-րդ նախագահ Ռոբերտ Քոչարյանին վերաբերող  ցանկացած գործով ցանկացած քննություն ու բացահայտում լինելու է նրա օգտին. լրագրողների հետ զրույցում ասաց Քոչարյանի գրասենյակի պատասխանատու Վիկտոր Սողոմոնյանը:

Նա հաստատեց, որ Քոչարյանը ստացել է վկայի կարգավիճակով Մարտի 1-ի գործով հարցաքննությանը ներկայանալու` ՀՔԾ ծանուցագիրը։

Նշենք, որ այս պահին Քոչարյանը գործով ներգրավված է որպես վկա: Իսկ ահա նրա պաշտոնավարման օրոք պաշտպանության նախարարի պաշտոնը զբաղեցրած Միքայել Հարությունյանը մեղադրյալ է։ Նա մեղադրվում է սահմանադրական կարգը տապալելու մեջ։

Հարցին` մտավախություն չունե՞ն, որ Ռոբերտ Քոչարյանին կարող են ներգրավել որպես կասկածյալ և մեղադրյալ, Սողոմոնյանը պատասխանեց. «Ստացվում է, որ սահմանադրական կարգ է եղել, որի կրողը եղել է հաղթած ընդդիմությունը, որը չի հաստատվում ո՛չ ԿԸՀ որոշումներով, ո՛չ ՍԴ որոշումներով։ Պաշտպանության նախարարությունն էլ այդ կարգը, նոր սահմանադրական ինստիտուտ ստեղծելով, տապալել է։ Սա ծաղր է օրենքի նկատմամբ»։

Նա հավելեց, թե չի հավատում, որ այդ եզրակացությունը գրել է իրավաբան:

Ինչ վերաբերում է բանակը քաղաքական գործընթացներում օգտագործելու վերաբերյալ խոսակցություններին, Սողոմոնյանն ընդգծեց, որ Սահմանադրությունն ամեն մեկը կարդում է այնպես, ինչպես ուզում է տեսնել, Սահմանադրության մեջ տեսնում է այն, ինչն ուզում է տեսնել։ Նա հորդորեց ուշադիր կարդալ 2005 թվականի Սահմանադրությունը, մասնավորապես՝ զինված ուժերին վերաբերող հատվածը, նախագահի լիազորությունները, համադրել փաստահավաք խմբի փաստերի հետ։ «Կտեսնեք, որ ակնհայտ փաստեր ուղղակի անտեսված են։ Այսինքն՝ պարզապես հարմարեցում է տեղի ունեցել այն քաղաքական նպատակներին, որ փաստահավաք խումբը հետապնդել է։ Իսկ այդպիսի նպատակներն ակնհայտ են, դրանց գոյությունը քննարկումից դուրս է։ Չկա այնպիսի հարց, որը կստիպի մեզ անհանգստանալ»,- ասաց Սողոմոնյանը։