Զինվորի հացը գողացողը ազգի դավաճան է. Շարմազանով

ԱԺ փոխնախագահ, ՀՀԿ խոսնակ Էդուարդ Շարմազանովը պնդում է` ցանկացած օրինախախտում իրենց համար դատապարտելի է, օրենքի առջև կրկնակի ստանդարտներ չպետք է լինեն: Այս մասին նա հայտարարեց լրագրողների հետ ճեպազրույցի ժամանակ՝ անդրադառնալով Մանվել Գրիգորյանի տանն անցկացված` ԱԱԾ ստուգումներին:

«Ես բաց ճակատով ասում եմ՝ նրանք, ովքեր բյուջեից մի կոպեկ գողացել են, թող օրենքի ողջ խստությամբ պատժվեն։ Եթե պարզվի, որ ինչ հրապարակել է ԱԱԾ-ն, իրականություն է, սրան արդարացում չկա»,- նշեց Շարմազանովը։

Անդրադառնալով Մանվել Գրիգորյանի հետ իր ու Վահրամ Բաղդասարյանի հանդիպմանը` նա նշեց, որ այդ ժամանակ Գրիգորյանն ասել է, որ հայտնաբերված զենքն իրեն չի պատկանում։

«Այդ ժամանակ Արցախյան պատերազմի մասնակիցներին ուղարկած նամակների, պայոկների հետ կապված խնդիր չի եղել։ Արարքը կատարվել է ու այն արդեն դատապարտելի է։ Սա խայտառակությունն է, իսկ ում կողմից է կատարվել, երբ է կատարվել ԱԱԾ-ն թող բացահայտի։ Նախաքննություն է գնում, թող իրավապահ մարմինները պարզեն։ Մենք պետք է հարգենք և' անմեղության կանխավարկածը, և' մյուս կողմի` հայտարարություններն ու կարծիք արտահայտելու իրավունքը: Մեկ բան հստակ է՝ զինվորի հացը գողացողը ազգի դավաճան է»,- եզրափակեց Շարմազանովը։