Սմբատ Գոգյանն ավելի շուտ աշխատանքից դուրս կգա, քան կոռուպցիոն գործարքների մեջ կներքաշվի. Սերոբ Խաչատրյան

Սկզբունքորեն այն մոտեցման կողմնակիցն եմ, որ պետք է որոշակի վստահության քվե տալ այն մարդկանց, ովքեր նշանակում են պաշտոնյաներին, այս դեպքում՝ վարչապետին, այսինքն՝ պետք է սպասել՝ մինչև որոշակի ժամանակ անցնի, և կտեսնենք՝ ինչպես են նշանակվածները դրսևորվում: ԲՈԿ-ի ղեկավարի նշանակման մասին խոսելով՝ ասաց կրթության ոլորտի փորձագետ Սերոբ Խաչատրյանը:

Ինչ վերաբերում է Բարձրագույն որակավորման կոմիտեի նախագահ Սմբատ Գոգյանին, ապա Խաչատրյանը գործի բերումով նրան ճանաչում է շուրջ 20 տարի, երբ Գոգյանը դեռ աշակերտ էր: «Այդ ժամանակ ես «Կրթություն» թերթի խմբագիրն էի, և Սմբատը մաթեմատիկայի համաշխարհային օիմպիադայում մեդալ էր նվաճել: Շատ տաղանդավոր տղա է, համաշխարհային օլիմպիադայում մեդալ նվաճելը խաղ ու պար չէ: Բացի այդ՝ նրա նման շատերը, ովքեր մեդալ են նվաճել, այսօր Հայաստանում չեն ապրում. ես հաշվարկ եմ արել՝ համաշխարհային օլիմպիադաներում մեդալ նվաճած երեխաների մոտ 80 տոկոսը Հայաստանից գնացել է: Այդ կարգի երեխաների համար կան որոշակի արտոնություններ, և նրանք հեշտությամբ կարող են ընդունվել աշխարհի ցանկացած համալսարան»,- ասաց Խաչատրյանը՝ հավելելով, որ լավ էր՝ Սմբատը մնաց Հայաստանում, աշխատեց մի շարք դպրոցներում՝ «Քվանտ»-ում, ֆիզմաթում:

Բացի այդ, նրա խոսքով, Սմբատ Գոգյանը նաև պրպտող մարդ է՝ ստեղծել է մաթեմատիկայի դասավանդման նոր մոդելներ, իր դպրոցն ունի՝ հիմնված այդ նոր մոդելների դասավանդման վրա, և ղեկավարում է Հայաստանի մաթեմատիկայի օլիմպիական թիմը: «Նա մի մարդ է, ով նվիրվել է Հայաստանին, աշխատում է սովորական դպրոցներում՝ սովորական աշխատավարձով: Նա նաև քաղաքացիական շատ շարժման է ակտիվ եղել և լավ գիտնական է: Ինչ վերաբերում է հարցին, թե ինչպիսի՞ ղեկավար կլինի, չեմ կարող կանխատեսել և խորհուրդ կտամ սպասել, քանի որ նույնիսկ ամենալավ մարդը կարող է պաշտոնում ձախողվել, և հակառակը: Սակայն ես գիտեմ, որ Սմբատը շատ սկզբունքային մարդ է, և վստահ եմ, որ ավելի շուտ աշխատանքից ազատվելու դիմում կգրի, քան կոռուպցիոն գործարքների մեջ կներքաշվի»,- ասաց Խաչատրյանը:

Նրա խոսքով՝ նոր նշանակումների առումով կարևորն այն է, թե ինչպիսի թիմային հարաբերություններ կստեղծվի և ինչպիսի թիմային հարաբերությունների դինամիկա կունենա նոր կառավարությունը: խաչատրյանի հավաստմամվ՝ եթե դինամիկան լավը եղավ, առանձին անհատների թերացումները կարող են լուրջ ազդեցություն չունենալ, բայց եթե այն լավ չլինի, ամենաուժեղ պրոֆեսիոնալներն էլ կարող են ձախողվել:

Yerkir.am-ի հարցին, թե ինչ փոփոխություններ են անհրաժեշտ կատարել՝ Խաչատրյանը նշեց, որ ԲՈԿ-ի հետ կապված մեծ բանավեճ կա և կա տեսակետ, որ կառույցը մեզ պետք չէ՝ այն պետք է լուծարել և այդ դերը վստահել մասնագիտական խորհուրդներին: Խաչատրյանի կարծիքով՝ Հայաստանում դեռևս պատրաստ չենք դրան: «ԲՈԿ-ի հիմնական խնդիրը պետք է լինի անորակ դիսերտացիաների դեմ պայքարը, քանի որ երբ նայում ենք վիճակագրությունը, Հայաստանում ֆանտաստիկ թեմաներով ու քանակով դիսերտացիաներ են պաշտպվանում: Օրինակ, տնտեսագիտությունից շատ-շատ են պաշտպանում, բայց տնտեսության վիճակը շատ վատ է, ինչը նշանակում է՝ պաշտպանված դիսերտացիաների որակը շատ թույլ է: Կուզենայի, որ պահանջնեորը խստացվեր, քանի որ հիմա գիտական կոչումների արժեզրկում ունենք, ինչի դեմ պետք է պայքարել»,-ասաց Խաչատրյանը:

Ըստ նրա՝ մարդիկ արդեն սկսել են մտածել, որ գիտական կոչում ստանալը հեշտ բան է, դրա համար պետք է վերահսկողությունը խստացվի: