Արևմտյան ԱՄՆ-ի Հայ Դատի հանձնախմբի աջակցած թեկնածուները հաղթահարել են ընտրությունների նախնական շեմը

ԱՄՆ-ում հունիսի 5-ին տեղի ունեցած կոնգրեսական, նահանգային օրենսդիր մարմինների և այլ պաշտոնների նախնական ընտրությունների արդյունքների համաձայն` Արևմտյան Ամերիկայի Հայ Դատի հանձնախմբի զորակցությունը վայելող գրեթե բոլոր թեկնածուները, բացի մեկից, կարողացել են ապահովել իրենց տեղը նոյեմբեր ամսին կայանալիք երկրորդ և վերջնական հանգրվանում:

Ըստ Asbarez-ի` թեկնածուների թվում են եղել Կալիֆոռնիայի նահանգապետի թեկնածու Քևըն Նյուսըմը, որը ստացել է քվեների 33 տոկոսը և ԱՄՆ օրենսդիր մարմինը Կալիֆոռնիայում ներկայացնելու համար պայքարող Քևըն դե Լեոն, որն ստացել է քվեների 11 տոկոսը:

Նյուսըմը կպայքարի հանրապետական գործարար Ջան Քոքսի դեմ, իսկ Լեոն` կմրցի Տայան Ֆայսթայնի դեմ:

«Ուրախ ենք, որ մեր աջակցությունը վայելող գրեթե բոլոր թեկնածուները կարողացան անցնել երկրորդ հանգրվան: Շնորհավորում ենք նրանց հաղթանակը: Նոյեմբերին կայանալիք ընտրությունների համար մենք աշխատելու ենք, որպեսզի մեր համայնքի ձայնն ավելի լավ լսելի դարձնենք»,- ասել է Արևմտյան Ամերիկայի Հայ Դատի հանձնախմբի իրավաբան Նորա Հովսեփյանը: