ՌԴ ԱԳՆ-ն սրբագրել է ինքն իրեն

 Այսօր տեղեկացրել ենք, որ  ՌԴ ԱԳՆ տեղեկատվության դեպարտամենտի տնօրեն Արտյոմ Կոժինը մեկնաբանել է ՀՀ վարչապետ Նիկոլ Փաշինյանի այն հայտարարությունը, որ Արցախը պետք է մասնակցի ԼՂ հակամարտությանն ուղղված բանակցային գործընթացին:

«Իր վերջին հարցազրույցներից մեկի ժամանակ Հայաստանի վարչապետ Նիկոլ Փաշինյանը հայտարարել է, որ ղարաբաղյան հակամարտության կարգավորմանն ուղղված բանակցություններն անհնար են առանց Ադրբեջանի օկուպացված տարածքներում ձևավորված անօրինական ռեժիմի մասնակցության: Որքանո՞վ  են նման հայտարարությունները բարդացնում կարգավորման գործընթացը և խանգարում կողմերին ընդհանուր լեզու գտնել»,- հարցրել է լրագրողը:

 «Ընդհանրապես, ամպագոռգոռ հայտարարությունները, որոնք այդ հարցով ԵԱՀԿ-ի կողմից նախանշված ռելսերի սահմաններից դուրս են, հավանաբար, ապակառուցողական են»,- պատասխանել է Կոժինը:

Ժամեր անց, սակայն, ՌԴ ԱԳՆ պաշտոնական կայքում հայտնվել է ճեպազրույցի սղագրությունը, որում մենք տեսնում ենք այլ պատասխան. «Ձեր ամպագոռգոռ հայտարարությունները, որոնք չեն տեղավորվում ԵԱՀԿ-ի ամրագրած ռելսերի մեջ, հավանաբար, ոչ կառուցողական են»:

Այնպիսի տպավորութւոն է, որ ռուսական կողմը փորձում է սրբագրել ինքն իրեն և այլ կերպ ներկայացնել ԱԳՆ պաշտոնյայի ասածը: