Ճոխության մոլուցքից պետք է ազատվել. ԿԳ նախարարը՝ ավարտական երեկոների մասին

Դրամահավաքություն ասելով՝ ավարտական երեկոները նկատի չեմ ունեցել, խոսքը վերաբերում է այն հսկայական գումարներին, որ հավաքվում և նվերների տեսքով հայտնվում են տնօրենների, ուսուցիչների սեղաններին. «Ազատության» ֆեյսբուքյան ասուլիսի ժամանակ ասաց ՀՀ ԿԳ նախարար Արայիկ Հարությունյանը:

Նրա խոսքով՝ վերահիշյալ դեպքն արդեն կոնկրետ կաշառք է և իր համար անընդունելի: «Դրա համար առաջին օրվանից պայքարում եմ դրա դեմ և շատ ուրախ եմ, որ արդյունք է տալիս: Ստացել եմ ավելի քան 100 հաղորդագրություն, համաձայն որոնց՝ տնօրենները, ուսուցիչները վերադարձնում են այն գումարները, որոնք նախկինում հավաքվել են:  Որոշ տնօրեններ, որ ակնկալիք են ունեցել դրամահավաքների հետ կապված, փորձում են պատասխանատվությունն իրենց վրայից գցել նախարարի խոսքերի վրա և արհեստականորեն խոչընդոտում են միջոցառումների, ավարտական երեկոների անցկացմանը»,- ասաց Հարությունյանը:

Ըստ նրա՝  ոչ այդքան մեծ գումարներով հնարավոր է շատ լավ օր անցկացնել ավարտական քննություններից հետո:  Նախարարի խոսքով՝ գուցե հնարավոր լինի հետագայում բյուջե նախատեսել այդ ավարտական միջոցառումների համար: «Ճոխության մոլուցքից պետք է ազատվել: Ուզում եմ ծնողներին և աշակերտներին ասել, որ որևէ խոչընդոտ չկա այդ օրվա ձեր ժամանցի հետ կապված, բայց այն չպետք է զգալի խնդիրներ ստեղծի ձեր ծնողների համար: Ծնողները շատ փոքր գումար պետք է հավաքեն, սակայն սեպտեմբեր ամսից արդեն իսկ գումարներ են հավաքում՝ նվերներ գնելու համար: Սրա դեմ դաժան պայքար է գնալու»,- նշեց Հարությունյանը: