Կլինի նիստ` Գագիկ Ծառուկյանի գլխավորությամբ, կորոշենք. Իվետա Տոնոյան

«Ծառուկյան» խմբակցությունը դեռ որոշում չի կայացրել` ինչպես է քվեարկելու ՀՀԿ-ի վարչապետի ընտրության ժամանակ: Yerkir.am-ի հետ զրույցում «Ծառուկյան» խմբակցության պատգամավոր, Գագիկ Ծառուկյանի մամուլի խոսնակ Իվետա Տոնոյանը տեղեկացրեց, որ դեռ որոշում չկա պետք է լինի խմբակցության նիստ` Գագիկ Ծառուկյանի  գլխավորությամբ, որի ժամանակ կքննարկվեն քվեարկության հետ կապված հարցերը:

«Երբ կլինի վերջնական դիրքորոշում, կտեղեկացնենք: Նիստը նախատեսվում է գումարել առաջիկա 1-2 օրվա ընթացքում»,- հայտնեց նա:

Մեր դիտարկմանը` խմբակցության պատգամավորներն իրենց  հարցազրույցներում հայտարարում են, որ եթե կողմ քվեարկեն ՀՀԿ-ի թեկնածուի օգտին, կնշանակի` ընդդիմություն չեն, և հարցին` նման պատասխանատու հայտարարությունը չի՞ նշանակում, որ, այդուհանդերձ, սկզբնական դիրքորոշում կա` դեմ քվեարկելու, Տոնոյանը պատասխանեց. «Յուրաքանչյուր պատգամավոր, բնականաբար, իրավունք ունի արտահայտելու իր կարծիքը, մանավանդ` նման կարևոր քաղաքական գործընթացի հետ կապված: Ինչ վերաբերում է պաշտոնական դիրքորոշմանը, ապա դա կլինի խմբակցության նիստից հետո, որը կղեկավարի Գագիկ Ծառուկյանը»:

Նա նշեց, որ այնպես չէ, որ Ծառուկյանի խոսքից է կախված խմբակցության որոշումը: «Մեր կուսակցությունում ներքին ժողովրդավարության կրիզիս չկա: Լինելու է քննարկում, նիստը նախագահելու է Գագիկ Ծառուկյանը, կհնչեն տեսակետներ, և կլինի միասնական դիրքորոշում»,- ասաց Տոնոյանը:

Պատգամավորից հետաքրքրվեցինք` իր անձնական տեսակետը ո՞րն է, եթե կողմ քվեարկեն ՀՀԿ-ի վարչապետի թեկնածուին, կստացվի` ընդդիմադիր չե՞ն, նա արձագանքեց. «Քանի որ ես մեծ և լուրջ քաղաքական թիմի անդամ եմ, ինչպես նաև Գագիկ Ծառուկյանի մամուլի խոսնակը,  ես բացառապես պաշտոնական տեղեկատվություն ձեզ կտրամադրեմ այն ժամանակ, երբ այն կլինի»: